Бэдзэогъум и 17-м, 2023-рэ илъэсым гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым инаучнэ иIофышIэ шъхьаIэу, филологие шIэныгъэхэмкIэ докторэу ЩэшIэ Щамсэт Ерыстэм ыпхъум идунай ыхъо­жьыгъ.

ЩэшIэ (Ергъукъо) Щамсэт чъэпыогъум и 1-м, 1950-рэ илъэсым къуаджэу ЯтIонэрэ Едэпсыкъуае къыщыхъугъ. 1976-рэ илъэсым Адыгэ къэралыгъо кIэлэегъэджэ институтым филологиемкIэ ифакультет къыухыгъ. 1976-рэ илъэсым щегъэжьагъэу 1977-м нэс еджэпIэ-интернатым щылэжьагъ. 1977 — 1990-рэ илъэсхэм научнэ пропагандэмкIэ отделым ипащэу Адыгэ хэкум икраеведческэ музей Iоф щишIагъ. 1990-рэ илъэсым къыщегъэжьагъэу гуманитар ушэтынхэмкIэ институтым иIофышI, 2009-рэ илъэсым ишышъхьэIу мазэ литературэм иотдел ипащэу агъэнэфагъ.

ЩэшIэ Щамсэт 1994-рэ илъэсым литерату­рэмкIэ кандидатскэ диссертациер, докторскэр — 2005-м къыгъэшъыпкъэжьыгъэх. Зыдэлэжьэрэ IофыгъохэмкIэ конференцие зэфэшъхьафхэм ахэлажьэщтыгъ, тхыгъэхэр къыхиутыщтыгъэх. Ащ икъэлэмыпэ къы­чIэкIыгъэ научнэ IофшIагъэхэм ащыщых тхылъхэу «Слово о «Нартах», «Продолжение кризиса», «Уроки лирической медитации», «Художественное своеобразие адыгейской поэзии (эволюция, поэтика, стилевые искания)», «Адыгэ усэн Iофым игъогупэхэр», нэмыкIхэри, художественнэ тхылъэу «Бзыужъый» зыфиIорэр.

ЩэшIэ Щамсэт 1997-рэ илъэсым къыще­гъэ­­жьагъэу Урысыем итхакIохэм я Союз хэ­тыгъ. Ар — Адыгэ Республикэм шIэныгъэхэм­кIэ изаслуженнэ IофышI, Адыгэ Республикэм шIэныгъэмкIэ и Къэралыгъо премие илау­реат. ШIэныгъэлэжьым «Адыгеим и Щытхъузехь» зыфиIорэ медалыр, шIухьафтын лъапIэхэр илъэс зэфэшъхьафхэм къыфагъэшъошагъэх.

МэщбэшIэ Исхьакъ Шумафэ ыкъу, Адыгэ Республикэм итхакIохэм я Союз иправление итхьамат

ЛIыIужъу Адам Хъусен ыкъу, гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым итхьамат