Адыгеим бжыхьэсэ лэжьыгъэхэм яIухыжьын щылъагъэкIуатэ. ПстэумкIи гектар 109801-рэ ар хъущтыгъ.

[caption id="attachment_136202" align="aligncenter" width="800"] Сурэтыр: А. Iэшъын.[/caption]

АР-м мэкъу-мэщымкIэ и Министерствэ бэдзэогъум и 17-м тызэрэщигъэгъозагъэмкIэ, ащ щыщэу 59552-р Iуахыжьыгъах. Ар ызыныкъом нахьыб.

Бжыхьэсэ хьэ гектар 9153,6-рэ республикэм щапхъыгъагъ. Ар Iуахыжьыгъах. Зы гектарым, гурытымкIэ лъытагъэу, центнер 44,2-рэ къырахыгъ, тонн 40059-м ехъу къаугъоижьыгъ.

Ащ нэмыкIэу чылапхъэ ­ашIыщт рапсэу гектар 10207-рэ яIагъ, 9848-р аIожьыгъ, тритикалер гектари 140-рэ мэхъу, ащ джыри игъо хъугъэп.

Бжыхьэсэ коцыр гектар 90300-рэ хъущтыгъ. Ащ 50438-м ехъу хагъэкIыгъ. Зы гектарым, гурытымкIэ лъыта­гъэу, центнер 45,1-рэ къыра­хыжьы.

Муниципальнэ образованиехэр пштэхэмэ, анахьыбэу Iузыхыжьыгъэр Джэджэ районым ичIыгулэжьхэр ары. Гектар 31517-у яIагъэм ипроцент 78-р, ар 20122-рэ, аIожьыгъах. Коцэу мы районым щыхалъхьагъэр гектар 23439-рэ хъущтыгъ, 17707-рэ хагъэкIыгъ. Зы гектарым, гурытымкIэ центнер 45,9-рэ къеты.

Анахьыбэу коцым къизыхырэр, гурытымкIэ центнер 51,8-рэ, Шэуджэн районым ичIыгу­лэжьхэр ары. ПстэумкIи гек­тар 14750-рэ мы культурэм рагъэубытыгъагъ, 7105-р Iуахыжьыгъ.

КъырахыжьырэмкIэ ахэм ауж кIэкIэу итых Красногвардейскэ районым ичIыгулэжьхэр. Бжыхьэсэ коц гектар 11691-рэ пстэумкIи яIагъ, Iуа­хыжьыгъэр 5100-рэ мэхъу, гурытымкIэ лъытагъэу, центнер 49,8-рэ къеты.

ЗэкIэмкIи комбайнэ 251-мэ республикэм ибжыхьасэхэр Iуахыжьых. Ахэм лэжьыгъэр зытырахыгъэу пстэумкIи гектар 47755-мэ уарзэр ащаупкIэтэжьыгъах, ар зыхажъухьажьыгъэр гектар 37504-р ары.

ХЪУТ Нэфсэт.