Бэдзэогъум и 22-р — шъхьэкуцIым и Дунэе маф. Ащ епхыгъэу шъхьэ­куцIым ипсауныгъэ къызэтегъэнэгъэным итхьамафэ бэдзэогъум и 17 — 23-м Урысыем щырагъэкIокIыщт, ар Адыгеими щэкIо.

Мы уахътэм къыкIоцI акъылым чанэу Iоф егъэшIэгъэн, жьы къабзэм ухэтэу бэрэ къэпкIухьан, лъыдэкIуаем улъыплъэн, диспансеризациер ыкIи нэмыкI уплъэкIун Iофтхьабзэхэр шIокI имыIэу ­игъом зэрэпкIунхэ фаер общественнэ псауныгъэмкIэ ыкIи медицинэ профилактикэмкIэ Адыгэ респуб­ликэ Гупчэм шъугу къегъэ­кIыжьы.

ШъхьэкуцIым иIофшIэн зызэщыкъокIэ, нервэлыпцэ узыр, эпилепсиер, «рас­сеянный склероз» зыфаIорэр, Iэблэсысыр, щыгъупшэныгъэр, ин­сультыр, нэмыкIхэри къыхэкIынхэ ылъэкIыщт.

Инсультым пэуцужьыгъэнымкIэ Дунэе орга­низацием къызэритыгъэмкIэ, илъэс къэс зэрэду­наеу нэбгырэ миллион 15-м ехъумэ инсультыр къяутэкIы. Урысыем илъэ­сым къыкIоцI шъхьэкуцI- лъыкъекIокI зэщыкъоныгъэм нэбгырэ мин 400-м ехъу еуталIэ.

COVID-19-р къызэузыгъэхэр зэрихьылIэрэ гу­мэкIыгъохэм ащыщ акъы­лым, бзэм, гупшысакIэм хэпшIыкIэу къызэращыкIэрэр, чъыер зэрэзэщыкъорэр, шъхьэузыр. А зэпстэуми «постковиднэ синдромкIэ» яджэх ыкIи ныбжьым хахъо къэс ахэми ахахъозэ, цIыфым иIэгъэ узхэр нахь къэпIэ­жъгъэих. Арышъ, а нэ­шанэхэм ащыщ шъуиIэ зэрэхъугъэм тетэу врачым зыфэжъугъаз.

— ЦIыфым инсульт иIа­гъэу щытмэ, лъынтфэхэм япхыгъэ гумэкIыгъохэр нахь лъэш мы­хъунхэм фэшI ащ фэIорышIэрэ Iэ­зэныр игъом ыхьын фае. ШъхьэкуцIым епхыгъэ зэ­щыкъоныгъэхэм агъэгумэкIыхэрэр ана­хьэу лъы­дэкIуаем, лъым изытет, гум иIоф­шIакIэ алъы­плъэнхэу щыт, — къ­ы­Iуагъ общественнэ псау­ны­гъэмкIэ ыкIи медицинэ профилакти­кэмкIэ ­Адыгэ республи­кэ Гуп­чэм ипащэу Мэт Заремэ.