Илъэсныкъо IофшIэныр зэфахьысыжьыгъ
ГъогурыкIоныр щынэгъончъэнымкIэ Къэралыгъо инспекцием и ГъэIорышIапIэу АР-м щыIэм илъэсэу тызхэтым имэзихэу пыкIыгъэм ашIэгъэ IофшIэныр зэфихьысыжьыгъ. Ащ фэгъэхьыгъэ зэхэсыгъом хэлэжьагъ Адыгэ Республикэм хэгъэгу кIоцI IофхэмкIэ иминистрэ игуадзэу Лъэустэнджэл Мыхьамодэ.
[caption id="attachment_136183" align="aligncenter" width="800"] Сурэтыр: АР-м и Къэралыгъо инспекций[/caption]
Джащ фэдэу Iофтхьабзэм хэлэжьагъэх Адыгеим и Къэралыгъо автоинспекцие ипащэ иIэнатIэ зыгъэцэкIэрэ Тхьаркъохъо Юсыф, гъэIорышIапIэм ипащэ игуадзэу, полицием иполковникэу Едыдж Мурат, гъэIорышIапIэм иIофышIэхэр, район подразделениехэм япащэхэр (видеозэпхыныгъэкIэ).
Едыдж Мурат къызэриIуагъэмкIэ, илъэсныкъоу блэкIыгъэм Адыгеим игъогухэм хъугъэ-шIэгъи 190-рэ атехъухьагъ, ахэм нэбгырэ 23-рэ ахэкIодагъ, 227-мэ шъобжхэр атещагъэхэ хъугъэ. ХэушъхьафыкIыгъэу зытегущыIагъэхэм ащыщ кIэлэцIыкIу гъогу-транспорт фыкъоныгъэу тишъолъыр щатхыгъэр. Зыныбжь имыкъугъэхэр зыхэфэгъэ аварие 18 республикэм щыхъугъ, ахэм зы нэбгырэ ахэкIодагъ, 20-мэ шъобжхэр хахыгъэх.
Ыпэрэ илъэсхэм афэдэу мы мэзихми гъогу хъугъэ-шIагъэхэм япчъагъэ ыкIи ахэм къахэкIырэ тхьамыкIагъохэр нахь макIэ шIыгъэнхэм автоинспекторхэм анаIэ тетыгъ. Мы IофшIэныр агъэцэкIэнымкIэ шъолъыр ыкIи район хэбзэ къулыкъухэм, общественнэ ыкIи нэмыкI организациехэм зэпхыныгъэ адыряI.
Зэхэсыгъом ГъэIорышIапIэм ипащэ игуадзэхэр, район подразделениехэм япащэхэр лъэныкъо зэфэшъхьафхэмкIэ къыщыгущыIагъэх. Министрэм игуадзэу Лъэустэнджэл Мурат ахэм зядэIум ыуж унэшъо гъэнэфагъэхэр афишIыгъэх. Къулыкъум иIофшIэн зыфэгъэзэгъэ лъэныкъохэу нахь агъэлъэшын ыкIи нахьышIоу зэхащэн фаехэм анаIэ тыраригъэдзагъ. Ахэр анахьэу зыфэгъэхьыгъэр пэшIорыгъэшъ ыкIи зэхэфын IофшIэныр гъэлъэшыгъэныр, ешъуагъэу, фитыныгъэ ямыIэу автомобилыр зезыфэхэрэр къыхэгъэщыгъэнхэм нахь лъэшэу дэлэжьэгъэныр ары.
Министрэм игуадзэ къыхигъэщыгъэхэм ащыщ Адыгеим игъогухэм къатехъухьэрэ хъугъэ-шIагъэхэр нахь макIэ шIыгъэнхэм фэIорышIэрэ амалхэр пхырыщыгъэнхэу ыкIи цIыфхэм афагъэцэкIэрэ къэралыгъо фэIо-фашIэхэр зэрифэшъуашэу арагъэгъотынхэу зэрэщытыр. А зэпстэуми адакIоу анахь шъхьаIэр агу къыгъэкIыжьыгъ — хэгъэгу кIоцI IофхэмкIэ къулыкъухэм ахэтхэм язекIуакIэ ыкIи хэбзэгъэуцугъэр зэрагъэцакIэрэм мэхьанэ зэриIэр.