Адыгеим икъэралыгъо автоинспекторхэм джэгукIэ шъуашэм илъ егъэджэн сыхьатхэр кIэлэцIыкIу Iыгъы­пIэхэм ащызэхащэх. Сабыйхэм яцIыкIугъом къыщегъэжьагъэу гъогурыкIоным ишапхъэхэр ябгъэшIэным мэхьанэ иIэу гъогу полицейскэхэм алъытэ.

[caption id="attachment_136177" align="aligncenter" width="800"] Сурэтыр: АР-м и Къэралыгъо инспекций[/caption]

Мыщ фэдэ егъэджэгъу сы­хьат­хэр инспекторхэм зэпымыоу чIыпIэ зэфэшъхьафхэм ащырагъэкIокIых. Зичэзыу Iоф­тхьабзэр Адыгэкъалэ, Тэхъутэмыкъое ыкIи Красногвардейскэ районхэм ащыкIуагъ.

ЗэIукIэгъу пэпчъ пэублэм полицейскэхэм кIэлэцIыкIухэр ягъусэхэу шапхъэхэр кIарагъэ­джыкIыжьыгъэх. Автомобилым ыкIи общественнэ транспортым зызэрэщыбгъэпсыщтыр, гъогу тамыгъэхэм хэшIыкIэу афыряIэр агъэпытагъ, нэфрыгъуазэм ышъо­хэр агу къагъэкIыжьыгъ.

Гъогум ущызэрыфэн ылъэ­кIыщт чIыпIэ къинхэр къафаIотэнхэри къэралыгъо автоинспекторхэм ащыгъупшагъэп. Ахэр зыфэдэхэр, уахэмыфэным фэшI пшIэн фаер ыкIи укъызэ­рахэ­кIыжьыщтыр нэрылъэгъу IэпыIэгъухэмкIэ къафагъэлъэгъуагъ.

ШIэныгъэу ныбжьыкIэхэм арагъэгъотыгъэр агъэпытэнымкIэ хэушъхьафыкIыгъэ чIыпIэм джэгукIэ зэфэшъхьафхэр инспекторхэм ащызэхащагъ. ГъогурыкIоным ишапхъэхэр кIэлэцIыкIухэм къызэрагурыIуагъэмкIэ якъулайныгъэ, ягубзыгъагъэ ыкIи ягулъытэ аушэтыгъ.

ЗэкIэ гъэцэкIэнэу инспекторхэм къаратыгъэхэр дэгъоу зэрэзэпачыгъэхэм фэшI ныбжьыкIэ цIыкIухэм нэфынэр къэзытырэ пкъыгъохэр шIухьафтынэу аратыгъэх.