КIэлэцIыкIу щагу джэгупIэхэм яIофшIэн Мыекъуапэ щылъагъэкIуатэ. Ахэм сабыйхэм яуахътэ чэфэу мы чIыпIэхэм зэращызэхащэрэм дакIоу, спорт ыкIи зэнэкъо­къу зэфэшъхьафхэр ащырагъэкIокIых.

АщкIэ къалэм дэт колледжхэм ыкIи апшъэрэ еджапIэхэм ястудентхэр IэпыIэгъу афэхъух. Джащ фэдэу бэмышIэу кIэлэцIыкIухэм адэжь Адыгеим икъэралыгъо автоинспекторхэр еблэгъагъэх. ДжэгукIэ шъуашэм илъэу гъогу полицейскэхэм кIэлэцIыкIухэм афызэхащэгъэ Iофтхьабзэр лъэшэу агу рихьыгъ ыкIи чанэу къыхэлэ­жьагъэх. ЛъэсрыкIо гъогу зэпырыкIыпIэхэр, автомобильхэр зэрыкIорэ гъогур щынэгъончъэу зэрэзэпачыщтхэр агу къагъэкIыжьыгъэх. ЗыщищыкIэгъэ уахътэм нэфынэр къэзытырэ пкъыгъохэр зэрагъэфедэнхэ фаер агурагъэIуагъ.

Нэужым гъогурыкIоным ишапхъэхэр нахь дэгъоу зышIэрэм икъы­хэгъэщынкIэ зэнэкъокъу рагъэкIокIыгъ, ащкIэ а мафэм шIэныгъэу инспекторхэм кIэлэцIыкIухэм арагъэгъотыгъэр агъэпытэн алъэкIыгъ.

Шъугу къэдгъэкIыжьын, мыщ фэдэ джэгупIэхэр Мыекъуапэ ипсэупIищмэ ащызэхащэ. ЯIофшIэн блыпэм къыщегъэжьагъэу бэрэскэшхом нэс пчыхьэм сыхьатыр 4-м аублэ ыкIи бэдзэогъур екIыфэ ахэр зэхэтыщтых:

— ур. Я 5-рэ переулкэр, 9; — ур. Димитровым ыцIэ зыхьырэр, 11; — ур. Димитровым ыцIэ зыхьырэр, 23; — ур. 12 Марта, 130/1; — ур. Свободэр, 413.