Гъэмэфэ мэфэ жъоркъхэм цIыфхэр псыхъохэм, бассейнхэм, псыу­тIэхэм якIух. Арэу щытми, зыщыбгъэпскIыным фытемыгъэпсыхьэгъэ чIыпIэхэм псым ущахэхьаныр зэрэщынагъор зэкIэхэми къагурыIоу пфэ­Iощтэп.

Урысые Федерацием ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм и къэралыгъо инспекцие къошъо цIыкIухэмкIэ и Гупчэ ипащэу Нэхэе Юрэ къызэриIуагъэмкIэ, илъэсым игъэмэфэ мазэхэм псыхъохэр щынэгъончъэу щытынхэм фэгъэхьыгъэ лъыплъэн­пэшIорыгъэшъ Iофтхьабзэхэр рагъэкIокIых. Урысые Федерацием ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм и Гупчэ АР-м хэгъэгу кIоцI IофхэмкIэ и Министерствэ, зыныбжь имыкъугъэхэм яIофыгъохэмкIэ комиссием хэтхэр, къошъо цIыкIухэмкIэ Къэралыгъо инспекциер, Адыгеим илъыхъо­кIо-къэгъэнэжьэкIо отряд, об­щественнэ организациеу «Шыу хасэр» зэгъусэхэу зызщыбгъэпс­кIы мыхъущт чIыпIэхэр къаплъы­хьэх, псыхъохэм цIыфым ищыIэныгъэрэ ипсауныгъэрэ къа­щыухъумэгъэнхэмкIэ шапхъэхэр зыукъохэрэм ыкIи псы Iушъохэм общественнэ рэхьатныгъэр ащы­зыукъохэрэм, джащ фэдэу псым ухахьэ зэрэмыхъущтыр зытетхэгъэ тамыгъэхэр зымыгъэуцугъэхэм административнэ пшъэ­дэкIыжьхэр арагъэхьы.

— ЦIыфхэр псым ымытхьэлэнхэм, шъобжхэр атещагъэ мыхъунхэм ыкIи псыхэр щы­нэгъончъэнхэм афэшI Урысые Фе­дерацием ошIэ-дэмышIэ Iоф­хэмкIэ и Министерствэ и ГъэIо­рышIэпIэ шъхьаIэу Адыгэ Рес­­публикэм щыIэм зызщагъэпс­кIырэ лъэхъаным щынэгъончъэу узэрэзекIон фэе методическэ унашъохэр муниципальнэ образованиехэм зэкIэми афигъэ­хьыгъэх, цIыфхэм ящынэ­гъон­чъагъэ къэухъумэгъэным епхыгъэ тамыгъэхэр псы Iушъохэм ащагъэуцунхэу унашъохэр афа­шIыгъэх, — еIо Нэхэе Юрэ.

ГъэIорышIапIэм игупчэ подразделение иинспекторхэм мэкъуогъу-бэдзэогъу мазэхэм уплъэкIун-дэкIыгъо 37-рэ зэ­хащагъ, зызщыбгъэпскIы мы­хъущт псыутIэ 38-рэ фэдизмэ цIыфхэр аIусхэу къыхагъэщыгъ.

ПэшIорыгъэшъ Iофтхьабзэу зэрахьэхэрэм ахахьэу инспекторхэм псыр щынагъоу зэрэщытыр цIыфхэм агурагъэIуагъ, ащкIэ зэдэгущыIэгъу 98-рэ фэдиз адашIыгъ. Джащ фэдэу гъэсэныгъэ учреждениехэм, кIэлэцIыкIухэм зызщагъэпсэфырэ лагерьхэм инспекторхэр ащыIагъэх, псыр щынэгъончъэным ылъэныкъокIэ кIэлэцIыкIу­хэм зэдэгущыIэгъухэр адашIыгъэх.

— Псыхэм цIыфхэм мыхъо­-мышIагъэхэр къазыкIыщяхъу­лIэрэр е псым зыкIитхьалэхэрэр зыгъэпскIыпIэ чIыпIэхэр ежьхэр зэрэфаеу къызэрэхахыхэрэр, псэу зыхахьэхэрэм зэрэщымысакъыхэрэр ыкIи ахэм япсауныгъэ къызэрэщамыухъумэрэр ары. КIэлэцIыкIухэм языгъэ­псэфыгъо гъэмэфэ лъэхъан ны­-тыхэр, алъыплъэщтхэ на­хьыжъхэр ямыгъусэхэу псым макIох ыкIи зызщыбгъэпскIы мыхъущт чIыпIэхэр къыхахых. Псым екIодылIэнхэм лъапсэ фэхъухэрэм ащыщых зэтемыгъэпсыхьэгъэ чIыпIэхэм зызэращагъэпскIырэр, ешъуагъэхэу псым зэрэхахьэхэрэр, зыныбжь имыкъугъэхэм зыпари алъымыплъэу псым зэратIупщыхэрэр, шапхъэхэр зэраукъохэрэр. Ана­хьэу унаIэ зытетын фаехэр сабый цIыкIухэр ары. Ны-тыхэр ренэу ахэм алъымыплъэхэмэ, кIэлэцIыкIоу нэпкъым Iутхэми тхьамыкIагъо къяхъулIэн алъэ­кIыщт, — къыIуагъ Ю. Нэхаим.

ГъэIорышIапIэм иIофышIэхэм анахьэу анаIэ зытырагъэтырэр кIэлэцIыкIухэр псым ымытхьа­лэнхэр ыкIи шъобжхэр атещагъэ мыхъунхэр ары. Ащ фэдэ хъугъэ-шIэгъэ тхьамыкIагъохэм кIэлэцIыкIухэр ащыухъумэгъэнхэм фэшI Урысые Федерацием ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм ны-тыхэм закъыфегъазэ ясабыйхэм алъыплъэнхэу, япшъэрылъхэр икъу фэдизэу агъэцэкIэнхэу, сабыйхэм ящы­Iэныгъэрэ япсауныгъэрэ на­хьыжъхэм аIэ зэрилъыр зыщамыгъэгъупшэнэу.

Мэфэ фабэхэм псым зыщагъэпскIыныр зикIасэхэм врачхэр къяджэх шъон пытэхэр амыгъэ­федэнхэу, сыда пIомэ фабэмрэ шъонымрэ зызэхахьэхэкIэ, ащ псауныгъэр псынкIэу зэщегъа­къо. ЕтIани цIыфыр ешъуагъэу псым зыхахьэкIэ, фэщым ыубы­тын ылъэкIыщт, ащ къыхэкIэу псым ытхьалэным ищынагъо къэуцу. Джащ фэдэу псым къыз­дихьырэ хъугъэ-шIэгъэ тхьамыкIагъохэм лъапсэ афэхъухэрэм ащыщ лъэгапIэхэм адэкIуае­хэшъ, къызэрэхапкIэхэрэр.

— ЗыгъэпскIыпIэу узыхахьэ мыхъущтхэм хэушъхьафыкIыгъэ тамыгъэхэр аIутых нахь мышIэми, цIыфхэр пфэгъэдаIохэрэп, — еIо Юрэ. — ЫужкIэ ащ гумэкIыгъоу къыздихьын ылъэ­кIыщтхэм ягупшысэхэрэп, ежь ашъхьэ къихьэрэмкIэ мэзекIох. Анахьэу цIыфыр ешъуагъэмэ, нахь къаигъэ мэхъу. Чэфым зэрихьэу ар псым зыхахьэкIэ, ыгу фэщэчырэп, ылъакъохэр еубытых, къедэIужьхэрэп — джары нахьыбэрэмкIэ псым ытхьалэхэу къызкIыхэкIырэр.

ЗызщыбгъэпскIы мыхъущт чIыпIэхэм ахахьэхэрэм апае хэбзэгъэуцугъэ аштагъэу Iоф ешIэ. Мыщ къыдилъытэрэ шап­хъэхэр зыукъохэрэм тазырхэр атыралъхьэх. Арэу щытми, ащи къыгъэуцухэрэп.

КIАРЭ Фатим.