Херсон хэкум и Гени­че­скэ район зыпкъ игъэуцожьыгъэнымкIэ ищыкIэгъэ амалхэр Адыгеим зэрехьэх, хэгъэгум ишъолъырыкIэхэм арысхэм зэрэфэлъэкIэу IэпыIэгъу арегъэгъоты.

Адыгеим и ЛIышъхьэу КъумпIыл Мурат япащэу ащ фэдэ Iофтхьабзэхэр зэхащэх. Партиеу «Единэ Россием» ишъолъыр къутам ары мы лъэныкъомкIэ зыгъэгъуазэхэрэр.

Адыгэ Республикэм и ЛIышъхьэ игъо зэрилъэгъугъэм тетэу Геническэ районым исхэм ателъытэгъэ шIушIэ IэпыIэгъур партиеу «Единэ Россием» и ­Адыгэ шъолъыр къутамэрэ иобщественнэ при­емнэрэ ренэу щаугъоих. Илъэсрэ ныкъорэм къыкIоцI Адыгеим тонн 350-рэ хъурэ шIушIэ IэпыIэгъу Херсон хэкум IэкIигъэхьагъ. Мы хэкум ирайон заулэмэ арысхэм джыри бэмышIэу тонн 20 хъурэ зичэзыу шIушIэ IэпыIэгъур афаригъэщагъ.

Партиеу «Единэ Россием» ишъолъыр гъэцэкIэкIо комитет ипащэу АфэшIэгъо Рэмэзан къызэриIуагъэмкIэ, зашъохэрэ псэу тонни 8, хьаджыгъэр, крупэ зэ­фэшъхьафхэр, макаронхэр, ща­ир, кофе, шъоущыгъу, пхъэшъхьэ-мышъхьэпс­хэр, тыгъэгъэзэ дагъэр, консерв­хэр ыкIи нэ­мыкIхэр зыдэлъ къэмлэнэ мин зау­лэ Геническэ районым арагъэ­щагъ. Iофтхьа­бзэу «Тхылъхэр Донбасс пай» зыфиIорэм ди­штэу гурыт еджапIэхэмрэ тхылъеджапIэхэмрэ тхылъ мин аIэ­кIагъэхьагъ.

Адыгеим икоординаторхэм Геническэ районым Iоф щашIэ. ГуфакIохэр яIэпыIэгъоу фэныкъохэм гъомылапхъэхэр ахэм аIэкIагъэхьащтых. Джащ фэдэу социальнэ учреждениехэр, транспорт, инженер инфраструктурэм ипсэуалъэхэр зыпкъ игъэуцожьыгъэнхэмкIэ тиреспубликэ нэмыкI амалхэри зэрехьэх.

Шъугу къэтэгъэкIыжьы Адыгеим ихэ­бзэ къулыкъухэр IэпыIэгъу афэхъухэзэ, социальнэ мэхьанэ зиIэ псэолъэ заулэ: МФЦ-р, псауныгъэр зыщагъэпытэрэ комплекситIу, гурыт еджапIэхэу N 1-мрэ 2-мрэ апае спорт джэгупIитIу Геническэ районым мыгъэ щагъэпсынхэу зэрэра­хъухьэрэр. Ахэм япсыунэхэри, язытхьа­кIыпIэхэри, япщэрыхьапIэхэри, ядэкIояпIэхэри ыкIи нэмыкIхэри агъэцэкIэжьыщтых.

«Урысыем ицIыфхэр гум ринэхэрэп. Адыгеим щыпсэухэрэр фэныкъохэм IэпыIэгъу афэхъузэ сыдигъуи къырэкIо. Тэ къытфагъэзэгъэ Геническэ районыр зыпкъ игъэуцожьыгъэнымкIэ тфэлъэкIырэр зэкIэ тапэкIи тшIэщт», — къыIуагъ КъумпIыл Мурат.

АР-м и ЛIышъхьэ ипресс-къулыкъу