Адыгэ Республикэм и Лъэпкъ музей инаучнэ IофышIэ шъхьаIэу, ти­гъэзет иныбджэгъушIоу, Урысыем ижурналистхэм я Союз хэтэу Тэу Аслъан ыныбжь илъэс 75-рэ зэрэ­хъурэр мы мафэхэм хегъэунэфыкIы.

1981-рэ илъэсым ар младшэ научнэ IофышIэу Адыгэ хэку краеведческэ музеим Iухьагъ. 1990-рэ илъэ­сым ишэкIогъу къыщегъэжьагъэу АР-м и Лъэпкъ музей инаучнэ IофышIэ шъхьаIэу щыт.

Пэсэрэ зэманым агъэфедэщтыгъэ пкъыгъохэр чIым къызыщычIатIыкIы­жьыгъэ Iофтхьэбзабэмэ Тэу Аслъан ахэлэжьагъ, археологием исаугъэтхэу псым ылъэсыхьэхэрэм якъэгъотыжьын ишъыпкъэу ыуж ит. Ащ къыхигъэщы­жьыгъэх Псэкъупсэ, Мартэбгышъхьэ, Къэпэнэшхо, Къэпэнэжъые, Пщыщэ къэхэлъэжъхэр, Пхъэгъугъапэ, ЧIышхо, Пщыкъуйхьэблэ, Нэчэрэзые, Лени­нэхьэблэ ижъырэ псэупIагъэхэр. А. Тэум къычIитIыкIыжьыгъэ пкъы­гъохэр Краснодар къэралыгъо тарихъ-археологическэ музей-заповедникэу Фелициным ыцIэ зыхьырэм чIэлъых, Адыгэ Республикэм и ­Лъэпкъ музей ифондхэм ахэлъых.

Аслъан, тыгу къыддеIэу уимэфэкIкIэ тыпфэгушIо, уигъашIэ кIыхьэ хъунэу, уипсауныгъэ зэтет зэпытынэу, жъы­шъхьэ мафэ ухъунэу, ренэу хахъо уиIэнэу тыпфэлъаIо!

«Адыгэ макъэм» иIофышIэхэр