Адыгеим и ЛIышъхьэ хьакIэхэр зыщагъэлъэпIэрэ Адыгеим, адыгэ къуаем ифестиваль зекIохэр къыригъэблэгъагъэх. Iоныгъом и 16 — 17-м Дэхъо гъэхъунэм ар щыкIощт.

— Адыгеим имызакъоу, нэмыкI чIыпIэхэми мы фестивалым икъэбар ащашIэ. Ар зыщыкIорэ мафэхэм зекIуабэмэ языгъэпсэфыгъо уахъти атырагъафэ. Фестивалыр зыщыIэщт мафэхэр агъэнэфэгъагъэх. Мыгъэ ар Iоныгъом и 16 – 17-м зэхащэщт.

ЫпэкIэ зэрэщытыгъэм фэдэу фестивалыр джыри Дэхъо гъэхъунэм щыкIощт, — къыIуагъ АР-м и ЛIышъхьэ. А мафэхэм Дэхъо гъэхъунэм лъэпкъ щагухэр щагъэпсыщтых, фестивалым ихьакIэхэр адыгэ къуаер зэрэрахырэ шIыкIэм нэIуасэ фашIыщтых, лъэпкъ шхыныгъохэм ахагъэIэщтых. Концертхэр къатынхэу, ермэлыкъхэр, лъэпкъ IэшIагъэхэмкIэ мастер-классхэр, кIэлэцIыкIухэмрэ зекIохэмрэ апае джэгукIэ зэфэшъхьафхэр зэхащэнхэу рахъухьэ.

— Фестивалым изэхэщэнкIэ лъэныкъо пстэури къыдалъытэнэу пшъэрылъ афэсшIыгъ. АщкIэ опытышхо тиI. Фестивалыр агу къинэжьынымкIэ, Адыгеим ихьакIэхэм нахьыбэу гухахъо агъотынымкIэ, тишэн-хабзэхэм, лъэпкъ шхыныгъохэм нэIуасэ зафашIынымкIэ ищыкIэгъэ пстэури тшIэщт, — къыIуагъ АР-м и ЛIышъхьэ.