Адыгеим, Краснодар краим ыкIи Ростов шъолъырым ястудентхэр ыкIи специалист ныбжьыкIэхэу техническэ гъэсэныгъэ зиIэхэр аналитикэмкIэ апэрэ гъэмэфэ еджапIэм щызэрэугъоигъэх. Бэдзэогъум и 10-м къыщегъэжьагъэу и 29-м нэс Адыгэ къэралыгъо университетым Iоф ащ щишIэщт.

[caption id="attachment_136090" align="aligncenter" width="800"] Сурэтыр: АКъУ[/caption]

ЫпкIэ хэмылъэу ныбжьыкIэхэм яшIэныгъэхэм ахагъэ­хъощт. Нэбгырэ 259-рэ хэлэжьэнэу фаехэу лъэIу тхылъхэр къатыгъагъ. Ахэм тест IофшIэни 102-рэ ашIынэу щытыгъ, пхырыкIыгъэр нэбгырэ 40. Ахэм ащыщэу 19-р — Мыекъуапэ, 14-р — Ростов-на-Дону, 7-р Краснодар щыщых.

— Компаниеу «Совкомбанк Технологии» зыфиIорэм пае проект тшIыныр ары пшъэрылъ шъхьаIэу тиIэр. Компанием ипащэхэм цыхьэ къытфашIи еджапIэр тиапшъэрэ еджапIэ зэрэщызэхэтщагъэм уасэ фэтэшIы. Ар ошIэ дэмышIэу щытэп, сыда пIомэ, Адыгэ къэралыгъо университетыр «Приоритет 2030» зыфиIорэ программэм хэлажьэ, ащ IT лъэныкъо зэфэшъхьафхэр хахьэх, — къыIуагъ апшъэрэ еджапIэм иректорэу Мамый Даудэ Iофтхьабзэр къы­зэIуихызэ.

Тхьамэфищым къыкIоцI проект зэфэшъхьафхэм Iоф ада­шIэщт, командэ пэпчъ гъэса­кIохэр ыкIи экспертхэр ягъусэхэу бизнесым епхыгъэ IофшIэнхэр агъэцэкIэщтых. Программэм икIэух яIофшIэнхэр аушэтыжьыщтых.

[caption id="attachment_136091" align="aligncenter" width="800"] Сурэтыр: АКъУ[/caption]

Москва, Санкт-Петербург ыкIи Казань ащыщ предприниматель цIэрыIо нэбгыри 9 Iоф­тхьабзэм хэлэжьэщтых. ГъэсакIо пэпчъ опыт ин IэкIэлъ, IT проектхэр ежь ашIыгъэх, дунэе ыкIи IT компаниехэм Iоф аща­шIагъ. Гъэмэфэ еджапIэм хэлажьэхэрэм гъэсэныгъэ проектыр акIунымкIэ IэпыIэгъу ахэр афэхъущтых, куп зэфэшъхьаф­хэм ахэтэу Iоф зэрашIэщтыр къарагъэлъэгъущт, сэнэхьатыкIэхэм нэIуасэ афашIыщтых. Анахь ныбжьыкIэ чанхэм «Совкомбанк Технологии» зыфиIорэм Iоф щашIэн амал къаратыщт.

Сервисэу «Хабр Карьера» зыфиIорэм къызэритырэмкIэ, 2022-рэ илъэсым мы компаниер Урысыем и IT — работодатель нахь дэгъуитфымэ ащыщ хъугъэ.

АКъУ-м ипресс-къулыкъу.