Щынэгъончъэныр гъэлъэшыгъэныр
[caption id="attachment_136087" align="aligncenter" width="800"] Лъэпкъ гвардием АР-мкIэ и ГъэIорышIапI[/caption]
УФ-м Лъэпкъ гвардиемкIэ и Федеральнэ къулыкъу и ГъэIорышIапIэу АР-м щыIэм 2023-рэ илъэсым имэзихэу пыкIыгъэм Iоф зэришIагъэр зыщызэфахьысыжьыгъэ зэхэсыгъо иIагъ.
Iофхьабзэм хэлэжьагъэх ГъэIорышIапIэм ипащэу, полицием игенерал-майорэу Олег Якушевыр, вневедомственнэ ухъумэным, чIыпIэ къулыкъум иведомствэ ыкIи отделениехэм япащэхэр, джащ фэдэу структурнэ подразделениехэм якомандирхэр.
«Лъэпкъ гвардием вневедомственнэ ухъумэнымкIэ икъулыкъу республикэм ит псэолъэ минрэ ныкъорэм ехъу ыкIи цIыфхэм яунэе псэолъэ мини 2-м ехъу къегъэгъунэ. 2023-рэ илъэсым мэзихэу пыкIыгъэм общественнэ рэхьатныгъэр къэухъумэгъэным, щынэгъончъэныр гъэлъэшыгъэным афэшI ГъэIорышIапIэм иподразделение дэкIыгъо 600 фэдиз иIагъ, хэбзэукъоныгъи 105-рэ щагъэзыягъ», — къыIуагъ къулыкъум ипащэу Андрей Власовым.
Лъэпкъ гвардием икъулыкъушIэхэм анахьэу анаIэ зытырагъэтыгъэр къэралыгъо ыкIи общественнэ щынэгъончъэныр, цIыфхэм яфитыныгъэхэр ыкIи яшъхьафитыныгъэ къэухъумэгъэнхэр ары. АР-м хэгъэгу кIоцI IофхэмкIэ и Министерствэрэ ГъэIорышIапIэмрэ зэгъусэхэу общественнэ-политическэ ыкIи мэхьанэшхо зиIэ Iофтхьабзэу тишъолъыр щызэхащэхэрэм Лъэпкъ гвардием икъулыкъушIэхэр ахэлажьэх.
Iашэр къызэрэрагъэкIокIырэм, ащ зэрэлъыплъэхэрэм, ахэм япхыгъэ IофшIэнхэр зэрагъэцакIэхэрэм ягугъу къышIыгъ лицензионнэ-Iизын гупчэм ипащэ иIэнатIэ зыгъэцэкIэрэ Андрей
Сорокиным. Ащ къызэриIуагъэмкIэ, Росгвардием республикэмкIэ икъутамэ иIофышIэхэр нэбгырэ мин 12-м ехъоу Iэшэ зэфэшъхьаф мин 22,5-м ехъу зыгъэфедэхэрэм гъунэ алъафы. Iашэр зэрагъэфедэрэм епхыгъэу уплъэкIун 1700-м ехъу подразделением икъулыкъушIэхэм рагъэкIокIыгъ. Iашэр къызфэзыгъэфедэрэ нэбгырэ заулэмэ административнэ пшъэдэкIыжьхэр арагъэхьыгъэх, хэбзэгъэуцугъэр зэраукъуагъэм къыхэкIэу Iашэ шъэ пчъагъэ къаIахыгъ, цIыфхэм ежь яшIоигъоныгъэкIэ 183-рэ къатыжьыгъ.
Республикэм ищыIэкIэ-псэукIэ нахьышIоу гъэпсыгъэнымкIэ Лъэпкъ гвардием мэхьанэшхо зэриIэм щэч хэлъэп. Арышъ, къулыкъум шIуагъэ къытэу иIофшIэн зэхищэным, цIыфхэм IэпыIэгъу афэхъуным, ахэр къыухъумэнхэм тапэкIи анаIэ зэрэтырагъэтыщтыр ГъэIорышIапIэм ипащэ къыIуагъ.