Адыгеим ичIыфэт организацие цIыфхэм яфитыныгъэхэмрэ яфедэхэмрэ къэзыгъэгъунэрэ хэбзэгъэуцугъэр зэриукъуагъэм фэшI тазыр тыралъхьагъ.

[caption id="attachment_136080" align="aligncenter" width="800"] Сурэтхэр: хьыкум приставхэм я ГъэIорышIапIэ ипресс-къулыкъу[/caption]

Хъулъфыгъэу Н-м хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ зыкъыфигъэзагъ. ЧIыфэт организацием илIыкIо чIыфэр къэзымытыжьырэм икъэ­бар IэкIигъэхьанэу зэрэригъэзырэр хабзэм зэрэдимыштэрэр ащ итхыгъэ итыгъ.

Хъулъфыгъэм къызэрэзэхифыгъэмкIэ, чIыфэт организацием иIофышIэ имобильнэ телефонкIэ къытеуи, чIыфэ зытелъ бзылъфыгъэу У-м мы телефон номерыр къызэрэритыгъэр, иIофшIэпIэ телефонэу ар къызэрэриIуа­гъэр къыхигъэщыгъ.

Хъулъфыгъэм банкым илIыкIо Iоф дыриIэ зэрэшIомыигъор, джэуап зэрэкIыримыхыщтыр риIуагъ. Ау а мэфэ шъыпкъэм банкым иIофышIэ ащ джыри къыфытеуагъ, ищыкIэгъэ къэбарыр къыретыфэ нэс ыуж зэримыкIыщтыр къыгуригъэIуагъ.

Банкым иIофышIэ къызэрэдэзекIуагъэр шIомытэрэзэу а хъулъ­фыгъэм хьыкум пристав­хэмкIэ Федеральнэ къулыкъум АР-мкIэ и ГъэIорышIапIэ зыфигъэзагъ ифитыныгъэхэр къыухъу­мэнхэу. УплъэкIунхэр зызэхащэхэм, чIыфэр къаIыхыжьыгъэным епхыгъэ пшъэрылъхэр зыгъэцэкIэрэ юридическэ лицэхэм яIофшIэн зэрэзэхащэрэ шIыкIэм гъунэ лъызыфырэ отделым нафэ къыфэхъугъ организацием Н-м ифитыныгъэхэмрэ ифедэхэмрэ зэриукъуагъэр.

Хьыкум приставхэм я Феде­ральнэ къулыкъу Адыгэ Респуб­ликэмкIэ и ГъэIорышIапIэ иIофышIэхэм УФ-м административнэ хэбзэукъоныгъэхэмкIэ и Кодекс ия 14.57-рэ статья иа 1-рэ Iахь диштэу организацием административнэ хэбзэукъоныгъэ зэришIы­гъэм­кIэ протокол зэхагъэу­цуагъ, сомэ мин 51-рэ тазырэу тыралъ­хьагъ.

Н-м джащ фэдэу Мыекъопэ къэлэ хьыкумыми итхьаусыхэ тхылъ IэкIигъэхьагъ, банкым иIофышIэ тэрэзыджэу къызэрэдэзекIуагъэмкIэ джыри пщыныжь зэрэтефэрэр ащ итыгъ. Хьыкумым Н-м илъэIу лъапсэ иIэу ылъытагъ, организацием сомэ мин 30 хъулъфыгъэм къыфызэкIигъэкIожьынымкIэ ищыкIэгъэ амалхэр зэрихьагъэх.