Адыгэ Республикэм исхэм япсауныгъэ икъэухъумэн зиIахьышIу хэзышIыхьэгъэ IофышIэхэр Адыгэ Респуб­ликэм и Правительствэ зычIэт унэм бэмышIэу ща­гъэ­шIуагъэх. Хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ иIофышIи тын лъапIэхэр зыфагъэшъошагъэхэм ащыщ.

Медицинэ IофышIэм и Мафэ ехъулIэу Адыгэ Республикэм и Къэралыгъо Совет – Хасэм и Тхьаматэу В.И. Нарожнэм ирэзэныгъэ тхылъ хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ ихьыкум приставэу, Урысыем идонор гъэшIуагъэу Владислав Павловым къыратыгъ.

Зигугъу къэтшIыгъэ ГъэIорышIапIэм илъэс 15-м къехъугъэу лъым итынкIэ Iофтхьэбзэ гъэнэфагъэхэр зэрехьэх. Хьыкум пристави 9-мэ «Урысыем идонор гъэшIуагъ» зыфиIорэ цIэ лъапIэр яI.

Ащ фэдэ щытхъуцIэр апэу къызыфагъэшъошагъэхэм Владислав Павловыр ащыщ. 2006-рэ илъэсым къыщегъэжьагъэу гъогогъуи 170-рэ ащ лъы ытыгъ, нэбгырэ пчъагъэмэ ящыIэныгъэ къыгъэ­нэжьыгъ.