Проектэу «Ны-предприниматель» зыфиIорэм хэлажьэ зышIоигъохэм ялъэIу тхылъхэр Адыгеим щаштэхэу рагъэжьагъ.

Ар зытегъэпсыхьагъэр кIэлэцIыкIу зиIэ бзылъфыгъэхэм Iоф горэм пыхьанхэмкIэ IэпыIэгъу ягъэгъотыгъэныр ары. Мы проектым хэлажьэхэрэм ищыкIэгъэ шIэныгъэхэр арагъэгъотыщтых, проект анахь дэгъум ипхырыщын пае сомэ мини 100 аратыщт. ЫпкIэ лъамытэу ныхэр мэфэ пчъагъэрэ рагъэджэщтых, тренинг зэфэшъхьафхэр афызэхащэщтых, икIэухым бзылъфыгъэ­хэр ябизнес-проектхэмкIэ зэ­нэкъокъущтых.

Программэу «Ны-предприниматель» зыфиIорэр Iоныгъом и 18-м къыщегъэжьагъэу и 22-м нэс тиреспубликэ щагъэцэкIэщт. «Мамапредприниматель.рф» зыфиIорэ сайтым Iоныгъом и 13-м нэс ялъэIу тхылъхэр агъэ­хьын алъэкIыщт.

Предпринимательствэм Iэпы­Iэгъу езыгъэгъотырэ Гупчэм ипащэу КIыкI Артур къызэриIуа­гъэмкIэ, программэм хэлэжьэнхэ алъэкIыщт зыныбжь илъэс 18 икъугъэ бзылъфыгъэхэу Iоф горэ къызэIузыхы зышIоигъохэр, зыныбжь имыкъугъэ кIэлэцIыкIухэр зиIэ е сабый къызыфэ­хъугъакIэу Iоф зымышIэхэрэр, кIэлэцIыкIухэр зыпIунэу зыштэгъэ бзылъфыгъэхэу илъэсым нахь мымакIэу предприниматель IофшIэным пылъхэр.

Мыщ фэдэ Iофтхьабзэр рес­публикэм апэрэп зэрэщызэхащэрэр. 2021-рэ илъэсым тIогъо­гогъо мыщ фэдэ зэнэкъокъу щыIагъ. Адыгеим ипредприниматель бзылъфыгъэ 64-м ехъу ащ хэлэжьагъ.

Лъэпкъ проектэу «Предпринимательствэ цIыкIумрэ гурытымрэ» зыфиIорэм диштэу мы программэр пхыращы. Ащ изэ­хэщакIохэр: Урысыем экономикэ хэхъоныгъэмкIэ и Министерств, Фондэу «Наше будущее» зыфиIорэр, Iахьзэхэлъ обществэу «Предпринимательствэ цIыкIумрэ гурытымрэ якорпорацие», Урысыем ибзылъфыгъэхэм я Союз.