Мысакъыныгъэр лъапсэ фэхъугъ
Адыгеим икъушъхьэхэу Фыщт-Ошъутенэ чIыпIэхэм адэжь илъэс 11 зыныбжь пшъэшъэжъыеу Шъачэ къикIи зекIо къэкIогъэ унагъом игъусагъэр ащыкIоди, къэгъэнэжьакIохэр ащ лъыхъугъэх.
ОшIэ-дэмышIэ IофхэмкIэ къулыкъум тыгъуасэ къызэритыгъэмкIэ, турбазэу Верхний Чуб янэ-ятэхэм ягъусэу пшъэшъэжъыем зыщигъэпсэфыщтыгъ, зыкIодыгъэр ахъшамхэм адэжь. ЗекIохэм ошIэ-дэмышIэ IофхэмкIэ къулыкъум иIофышIэхэм къафаIотагъ бэдзэогъум и 13-м пчыхьэм сыхьатыр 5-м адэжь километри 2 фэдизкIэ хыгъэхъунэм пэчыжьэу пшъэшъэжъыер зэрэщалъэгъугъэр, турбазэм ылъэныкъокIэ ар зэрэкIощтыгъэр.
— Хыгъэхъунэу Псынэдахэ нэс кIохи къызэкIожьхэм, пшъэшъэжъыер зэрямыгъусэжьым гу лъатагъ, — къаIотагъ ошIэ-дэмышIэ IофхэмкIэ къулыкъум и Къыблэ шъолъыр къутамэ икъэгъэнэжьакIохэм.
Мы хъугъэ-шIагъэм фэгъэхьыгъэ уплъэкIунхэр следственнэ комитетым зэхищагъэх. Ащ ипресс-къулыкъу къытыгъ лъыхъон IофшIэнхэр зыщыкIохэрэ чIыпIэм следовательхэмрэ криминалистхэмрэ зэрэнэсыгъэхэр, зэфэхьысыжьэу ашIырэм елъытыгъэу унашъо къызэрэкIэлъыкIощтыр.
Пшъэшъэжъыем икъэгъотыжьынкIэ Iофхэр зэрэкIохэрэм лъыплъагъ Адыгеим и ЛIышъхьэу КъумпIыл Мурат.
КъэгъэнэжьакIохэм лъыхъонымкIэ щыIэ амал пстэури зэрагъэфедэрэр – лъыхъоныр зисэнэхьат купхэм Iоф зэрашIэрэр, ошъогумкIи лъыплъэныр зэрэзэхэщагъэр ащ къыIуагъ. ОшIэ-дэмышIэ IофхэмкIэ Адыгеим икъулыкъушIэхэри, Къыблэ шъолъырым икъутамэ иIофышIэхэри — пстэумкIи нэбгырэ 29-рэ лъыхъонхэм зэрахэлажьэрэмкIэ макъэ къыгъэIугъ. Республикэм щыпсэухэрэми, ащ хьакIапIэ къакIохэрэми агу къыгъэкIыжьыгъ зекIоным ишапхъэхэр агъэцэкIэнхэм мэхьэнэ ин зэриIэр: «Гъогууанэу шъузтехьэхэрэр ошIэ-дэмышIэ IофхэмкIэ къулыкъум щяжъугъэтхых, шъори, шъуигъусэхэми ящынэгъончъагъэ шъунаIэ тежъугъэт!»
Нэужым, щэджэгъоужхэм адэжь, КъумпIыл Мурат къэбарышIур исоциальнэ нэкIубгъохэм къаригъэхьагъ: «Пшъэшъэжъыер къагъотыжьыгъ! Псау, узынчъ, изытет уигъэрэзэнэу щыт, янэ-ятэхэм аIэкIагъэхьажьыгъ».
Джащ фэдэу республикэм ипащэ къэгъэнэжьакIохэми, цIыф къызэрыкIохэми зафигъэзагъ: «Сигуапэ хъугъэ-шIагъэм кIэух дэгъу зэрэфэхъугъэр. ОшIэ-дэмышIэ IофхэмкIэ къулыкъуми, нэмыкIхэу лъыхъоным хэлэжьагъэхэми сафэраз язекIуакIэхэр зэдиштэхэу сабыир къэгъэнэжьыгъэнымкIэ яшIуагъэ къызэрэкIуагъэм пае.
СыдигъокIи пщыгъупшэ хъущтэп къушъхьэхэр егъэлыягъэу узщысакъын ыкIи щынэгъончъэным ишапхъэхэр зыщыбгъэцэкIэн фэе чIыпIэу зэрэщытхэр».