Адыгеим и Парламент и Тхьаматэу Владимир Нарожнэмрэ ащ игуадзэу Цэй Эдуардрэ фэтэрыбэу зэхэт унэу Адыгэкъалэ дэтхэм ягъэкIэжьын, ахэм ящагухэм язэтегъэпсыхьан япхыгъэ IофшIэнхэр зэрэзэшIуахыхэрэр джырэблагъэ зэрагъэлъэгъугъ.

АР-м и Къэралыгъо Совет – Хасэм идепутатхэу Мыгу Адамрэ Джанхъот Аслъанрэ, муниципальнэ образованием иадминистрацие ипащэу Хьачмамыкъо Азэмат, нэмыкIхэр ягъусэхэу ахэр проспектэу Лениным ыцIэ зыхьырэм тет унэу N-у 3-м ищагу апэ кIуа­гъэх. «Iэрыфэгъу къэлэ щыIакIэр гъэпсыгъэныр» зыфиIорэ программэм къыдыхэлъытагъэу ащ ищагу зэтырагъэпсыхьажьы. ХъызмэтшIапIэу «Стройкомплекс» зыфиIорэр ары подрядчикэу Iоф щызышIэрэр. Ащ мы уахътэм кIэлэцIыкIу джэгупIэр ешIы, асфальтэу дэлъыр зэб­лехъу, автомашинэхэм апае уцупIэхэр егъэпсых, нэмыкI Iоф­шIэнэу зэшIуихын фаери бэ.

Ащ пэмычыжьэу щыт унэу N-у 7-м цIыфэу чIэсхэм ялъэ­IукIэ ышъхьэ джырэблагъэ зэблахъугъ. Фэтэрыбэу зэхэт унэхэм ачIэсхэм зэдагъэфе­дэхэрэм ягъэкIэжьын фытегъэ­псыхьэгъэ программэм къы­ды­хэлъытагъэу ар агъэцэкIагъ.

Мы лъэныкъом фэгъэзэгъэ Адыгэ республикэ Фондым ипащэу Пщыгъонэ Руслъан зэрэщигъэгъозагъэхэмкIэ, унэ­хэр шапхъэхэм адиштэхэу шIыгъэнхэм, ачIэсхэм псэукIэ амал тэрэзхэр яIэнхэм афэшI Адыгэкъалэ мы программэм чанэу къыхэлажьэ. ГущыIэм пае, 2022-рэ илъэсэу кIуагъэр пштэ­мэ, къатефэрэр хэзыгъэ имыIэу унэхэм ачIэсхэм къатыгъ, на­хьыпэкIэ чIыфэ зытелъыгъэхэми ар къапщыныжьыгъ.

— Къалэр проектхэм, программэхэм чанэу зэрахэлажьэ­рэр къыхэщы хъугъэ, — къы­Iуагъ Владимир Нарожнэм ылъэгъугъэм уасэ къыфишIызэ. — АР-м и ЛIышъхьэу Къум­пIыл Мурат, Правительствэм анаIэ къызэратетым, цIыфэу дэсхэм чаныгъэ къы­зэрэзы­ха­гъафэрэм яшIуагъэкIэ аужырэ илъэсхэм зэхъокIыныгъэшIухэр зэрэфэхъугъэхэр нэры­лъэгъу. ТапэкIи ащ тетэу Iофхэр лъыкIуатэхэмэ, щыкIэгъабэ дэгъэзыжьыгъэ хъущт. Анахь шъхьа­Iэхэм ащыщыр псы къабзэу зэ­шъощтхэр санитарнэ шапхъэ­хэм адиштэу ыкIи икъоу цIыф­хэм аIэкIэгъэ­хьэгъэныр ары.

Хабзэ зэрэхъугъэу, респуб­ликэ Парламентым ипащэхэмрэ идепутатхэмрэ цIыфэу унэхэм ачIэсхэми гущыIэгъу афэхъу­гъэх. Ахэм ягумэкIыгъохэм къа­лэр нахь кIэракIэ, нэфынэ зэрэ­хъугъэр, гъэпсэфыпIэ чIыпIэ дэхабэ джы зэряIэр къыхагъэщыгъ, нэмыкIэу зыгъэгумэкIы­хэрэмкIэ къадэгощагъэх, ежь ышъхьэкIэ IэпыIэгъу зищыкIа­гъэу закъыфэзгъэзагъэхэри къа­­хэ­кIыгъэх. Ахэм ягумэкIыгъохэм ядэгъэзы­жьын амалэу щыIэмкIэ анаIэ зэрэтетыщтыр Владимир Нарожнэм къыхигъэщыгъ.

ХЪУТ Нэфсэт.