Мы аужырэ илъэсхэм гъэсэныгъэм исистемэ зэхъокIыныгъэшIухэр фэхъугъэх. Республикэм ичIыпIэ зэфэшъхьафхэм гурыт еджапIэхэр, кIэлэцIыкIу IыгъыпIэхэр кIэу зэращашIыхэрэм дакIоу игъэкIотыгъэ гъэцэкIэжьынхэри ащэкIох.

Урысые Федерацием и Президентэу Владимир Путиным иунашъокIэ игъэкIотыгъэ гъэцэкIэжьынхэм япхыгъэ къэралыгъо программэм къыдыхэ­лъытагъэу гурыт еджапIэхэр агъэкIэжьых.

Партиеу «Единэ Россием» ипрограммэ ихэушъхьафыкIыгъэ едзыгъоу ар щыт, Урысыем гъэсэныгъэмкIэ и Министерствэ ягъусэу шъолъырхэм IофшIэнхэр ащызэшIуахых. Мы программэм къыдыхэлъытагъэу гъэрекIо Адыгеим игурыт еджэпIи 9-мэ игъэкIотыгъэ гъэцэкIэжьынхэр арашIылIагъэх, мыгъэ еджэпIи 7 агъэцэкIэжьы.

Мы программэр республикэм зэрифэшъуашэу щагъэцэкIэным АР-м и ЛIышъхьэ лъэшэу ынаIэ тет. Гурыт еджапIэхэу программэм хэхьагъэхэр илъэсыкIэ еджэгъум ехъулIэу хьазырынхэ зэрэфаер, гъэцэкIэжьынхэм яшIуагъэкIэ ахэм теплъакIэ яIэ зэрэхъущтыр, аужырэ шап­хъэхэм адиштэу зэрэгъэпсы­гъэщтхэр КъумпIыл Мурат къы­хегъэщы.

ГъэцэкIэжьынхэр зыщыкIорэ еджапIэхэм ащыщ мы мафэхэм тыщыIагъ. Шэуджэн районым ит къутырэу Тихоновым дэт гурыт еджапIэу N 9-м IофшIэнхэр зэрэщыкIохэрэр зэдгъэлъэгъугъ.

Ащ ипащэу Алексей Кондратьевыр къытпэгъокIыгъ, яIоф­хэм язытет къытфиIотагъ.

— ТиеджапIэ жъы дэд, Iоф зишIэрэр мыгъэ илъэс 55-рэ хъугъэ. КIэлэеджэкIуи 131-рэ щеджэ, ащ щыщэу я 11-рэ классыр нэбгыри 2-мэ, я 9-р нэбгырэ 18-мэ къаухыгъ, апэрэ классым нэбгырэ 15 къекIо­лIэнэу щыт.

ТиеджапIэ зыкIи гъэцэ­кIэжьынышхохэр рашIылIа­гъэхэп, шъхьа­ныгъупчъэхэр къытфызэблахъугъагъэх ныIэп. Аужырэ илъэсхэм кIашъом къыкIэщхы хъугъагъэ. Федеральнэ программэм тызэрэхэфагъэр, тиеджапIэ шапхъэхэм адиштэу къызэрэтфагъэпсырэр лъэшэу ти­гуапэ, — еIо тигущыIэгъу.

ЕджапIэр къатитIоу зэтет. ЫкIоцIкIэ дэпкъхэр чырбыщым нэс аукъэбзызэ икIэрыкIэу ашIыжьыгъэх, джэхашъохэр ратхъыжьхи рагъэчъыкIыгъэх, кIэу радзэжьыщтых, пчъэхэр зэблахъущтых.

— ЫпэрапшIэу гурыт еджа­пIэм игъэфэбапIэхэр, псырыкIуапIэхэр, электричествэр къызэрыкIощтыр зэблахъу­гъэх, канализациер зэтыра­гъэпсыхьажьыгъ. ДжырэкIэ дэпкъхэм ягъэцэкIэжьын ыуж итых. Еджа­пIэм кабинет 16 ыпэ­кIэ иIагъ, ахэм зы ахэдгъэ­хъуагъ. Джащ фэдэу кIэлэеджакIохэм языгъэпсэфыгъо уахътэ зыщагъэкIон алъэкIыщт чIыпIэ дгъэнэфагъэ. ШхапIэр зэрифэ­шъуашэу зэтедгъэпсыхьащт, ищыкIэгъэ Iэмэ-псымэхэр чIэдгъэуцощтых, — еIо Алексей Кондратьевым.

IофшIэнхэм апэIухьанэу федеральнэ бюджетым къыхэхыгъэ сомэ миллион 23-рэ мин 700-рэ къафатIупщыгъ. Ащ нэмыкIэу бюджет зэфэшъхьафхэм къаха­хыгъэ ахъщэ тедзэу къафатIупщыгъэм ишIуагъэкIэ партэхэр, пхъэнтIэкIухэр кIэу, доскэхэр, кIэлэегъаджэхэм ящыкIэгъэщтыр зэкIэ зэрагъэгъотыщтых. Джащ фэдэу илъэсыкIэ еджэгъум зэреджэщтхэ тхылъхэр къащэфыгъахэх. Ахэм сомэ мин 600 атефагъ.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Румус» зыфиIорэм IофшIэнхэр зэрифэшъуашэу егъэцакIэх. Джащ фэдэу «Стройконтролым» зэзэгъыныгъэ да­шIыгъэу IофшIэнхэр зэрагъэца­кIэхэрэм гъунэ лъафы. Ежь еджапIэм ипащи мафэ къэс ахэт. Непэрэ мафэм ехъулIэу планэу агъэуцугъэм тетэу Iоф­шIэнхэр макIох. «Точка роста» зыфиIорэр гурыт еджапIэм илъэсыкIэ еджэгъум ехъулIэу къыщызэIуахыщт. Ащ фэгъэхьыгъэу кабинети 3 зэтырагъэпсыхьащт. ФизикэмкIэ, химиемкIэ ыкIи биологиемкIэ шъхьафхэу, джащ фэдэу технологическэ кабинет агъэпсыщт. Iэмэ-псымэу ящыкIагъэхэр къы­рагъэуалIэу рагъэжьагъ, электроннэ микроскопи 5 къафащэгъах. IофшIэнхэр мэлылъфэгъу мазэм рагъэжьагъэх. Еджэгъу илъэсым иаужырэ мэзитIум гъу­нэгъу еджапIэм ащэхэзэ рагъэджагъэх. Тэ тызщыкIогъэ мафэм еджапIэм ышъхьэ изэб­лэхъун ыкIэм факIощтыгъ.

Гъэсэныгъэм иучреждениехэр гъэкIэжьыгъэнхэм епхыгъэ программэм ишIуагъэкIэ Тихоновым дэт гурыт еджапIэр джырэ шапхъэхэм адиштэу, дахэу ыкIи гупсэфэу хъущт. Лъэхъаным диштэрэ еджапIэр кIэлэегъа­джэхэмкIи, кIэлэеджакIохэмкIи гуIэтыпIэ афэхъущт.

ДЕЛЭКЪО Анет. Сурэтхэр: Iэшъынэ Аслъан.