Адэбз узхэм зыщяIэзэхэрэ Адыгэ республикэ клиническэ диспансерым джырэ лъэхъаным диштэрэ томографэу сомэ миллион 28-м ехъу зыуасэр къащагъ. «Адэбз узхэм апэ­шIуе­­кIогъэныр» зыфиIорэ программэм къы­ды­­хэлъытагъэу онкологие къулыкъум изэте­гъэпсыхьагъэн пае мы мылъкур мыгъэ къыхагъэкIыгъ.

— Непэ шъолъыр онкологие къулыкъум радионуклиднэ уплъэкIуныр зищыкIагъэу къеуалIэрэр бэ. ПэшIорыгъэ­шъэу къызэрэтлъытагъэмкIэ, илъэсым ащ фэдэ уплъэ­кIун мини 3-м нэс тшIынэу мэхъу. Тхьабылыр сцинтиграфие ашIыным пае Краснодар е нэмыкI шъолъырхэм тисымаджэхэр дгъакIощтыгъэх. Чэзыум мэзи 4 — 5 ежэщтыгъэх. Джы а Iофыгъор дэгъэзыжьыгъэ хъущт, — къы­Iуагъ адэбз узхэм зыщяIэзэхэрэ диспансерым иврач шъхьаIэу АкIэгъу Заур.

Мы уахътэм оборудованием игъэуцун фежьагъэх. Ащ иIоф­шIэн зиублэкIэ, адэбзыр куоу зыхэт чIыпIэр нахь дэгъоу къыгъэлъэгъощт.