ИIэнатIэ къызфигъэфедагъ
Адыгэ Республикэм хэгъэгу кIоцI IофхэмкIэ и Министерствэ и ГъэIорышIапIэу наркотикхэр хэбзэнчъэу амыгъэзекIонхэм гъунэ лъызыфырэм ипащэ игуадзэу щытыгъэм къыфаIэтыгъэ уголовнэ IофымкIэ хьыкумым унашъоу ыштагъэм кIуачIэ иIэ хъугъэ.
ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэрэ республикэ полицием щынэгъончъэнымкIэ иотделрэ яIофышIэхэм зэрагъэунэфыгъэмкIэ, 2019-рэ илъэсым имэзае къыщегъэжьагъэу 2023-рэ илъэсым ищылэ мазэ нэс Адыгэ Республикэм хэгъэгу кIоцI IофхэмкIэ и Министерствэ и ГъэIорышIапIэу наркотикхэр хэбзэнчъэу амыгъэзекIонхэм гъунэ лъызыфырэм ипащэ игуадзэу Р.М. Нэфышъым полномочиеу иIэхэр къызфигъэфедэзэ, оперативнэ-лъыхъон Iофтхьабзэхэм апае АР-м и МВД къыфыхагъэкIыгъэ сомэ мин 400-м ехъур иджыбэ рилъхьагъ. Зэзэгъыныгъэ шIыкIэм тетэу шъэфэу къадэлажьэхэрэм а ахъщэр аратын фаеу щытыгъ. ХэбзэухъумэкIо къулыкъухэм яIофышIэхэм зэрагъэунэфыгъэмкIэ, Р.М. Нэфышъым АР-м и МВД икассэ а ахъщэр зытефэхэрэм зэраратыгъэр къызщыгъэшъыпкъэжьыгъэ документ нэпцIхэр рихьылIэщтыгъэх.
ЩынэгъончъэнымкIэ федеральнэ къулыкъум къыгъэхьазырыгъэ материалхэр иIэубытыпIэу Урысыем и Следственнэ комитет Адыгэ РеспубликэмкIэ иследственнэ ГъэIорышIапIэ оперативнэ-лъыхъон Iофтхьабзэхэр зэрихьагъэх. Ащ икIэуххэм атетэу илъэс 39-рэ зыныбжь Нэфышъ Рустам иIэнатIэ къызфигъэфедэзэ, гъэпцIагъэкIэ ахъщэшхо къызэрэзIэкIигъэхьагъэм фэшI Урысыем и Уголовнэ кодекс ия 159-рэ статья ия 3-рэ Iахь диштэу уголовнэ Iоф къыфызэIуахыгъ.
Урысыем и Уголовнэ кодекс ия 159-рэ статья ия 3-рэ Iахь диштэу Адыгэ Республикэм и Апшъэрэ хьыкум сомэ 350000-рэ тазырэу Р.М. Нэфышъым тырилъхьагъ, илъэсрэ ныкъорэкIэ хэбзэухъумэкIо къулыкъухэм Iоф ащишIэн фимытэу ыгъэнэфагъ.
Хьыкумым иунашъо кIуачIэ иIэ хъугъэ.
ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ ипресс-къулыкъу