Мэзчэтыум и Мафэ Кавказ къэралыгъо биосфернэ заповедникым бэдзэогъум и 15-м щыхагъэунэфыкIыщт.

ЧIыопсым идэхагъэрэ ибаиныгъэрэ шIу зылъэгъу­хэрэм апае экскурсиехэр, зэнэкъокъухэр, къэгъэлъэ­гъонхэр зэхащэщтых, ахэр экогупчэу «Гъозэрыплъэ», «мэзчэтыум илъагъо» къызщызэIуахыгъэм, щыкIощтых.

[caption id="attachment_135869" align="aligncenter" width="800"] Кавказ заповедникыр[/caption]

А лъагъом урыкIоныр къинэп, километритIу икIыхьагъэр. Ащ икъежьапIэ мэзчэтыум исаугъэт щыт, ыбгъу­хэмкIэ интерактивнэ станциехэр, мэкъэгъэIу пхъэмбгъухэр, мэзчэтыум ипсэукIэ, ышхыхэрэр, изекIуакIэ къэзыIуатэхэрэр аIутых.

Заповедникым ипресс-къулыкъу макъэ къызэригъэ­IурэмкIэ, а мафэм зэхащэщт Iофтхьабзэхэр инхэми цIыкIухэми ашIогъэшIэгъоныщтых. Нахь куоу мэзчэтыум пылъ къэбархэр зэзыгъашIэ зышIоигъохэр мастер-классхэм ахэлэжьэщтых, лекциехэм ядэIущтых.

[caption id="attachment_135870" align="aligncenter" width="800"] А. Гусев.[/caption]

Мэзчэтыухэр заповедникым зэрэщыхагъэкIодыкIыгъагъэхэмрэ илъэсыбэ текIыгъэу къызэрэхагъэхъожьыгъэхэмрэ апылъ къэбарыр зышIэнэу фаехэр документальнэ фильмэу «Леопард — возвращение легенды» зыфиIорэм рагъэплъыщтых.

ИлъэсиблыкIэ узэ­кIэ­Iэбэжьмэ, 2016-рэ илъэ­сым, бэдзэогъум и 15-м, мэзчэтыу щырхэр мэзым щыпсэунхэу зыщагъасэхэрэ Гупчэу заповедникым иIэм иIофы­шIэхэм апэрэ мэзчэ­тыухэр мэзым хатIупщыхьэгъагъэх. Джащ къыщегъэжьагъэу илъэс къэс а мафэр мэзчэтыум и Мафэу ха­гъэунэ­фыкIы.