ШIэжьыр пытэнэу
АР-м и Къэралыгъо Совет — Хасэм и Тхьаматэу Владимир Нарожнэмрэ ащ игуадзэу Цэй Эдуардрэ Бзыикъо заом хэкIодагъэхэм апае Краснодар краим и Северскэ район щагъэуцугъэ саугъэтым игъэцэкIэжьын зыщытегущыIэгъэхэ зэхэсыгъо Тэхъутэмыкъое районым щызэхащэгъагъ.
[caption id="attachment_135854" align="aligncenter" width="800"] АР-м и Къэралыгъо Совет — Хасэр[/caption]
Iофтхьабзэм хэлэжьагъэх мы муниципальнэ образованием иадминистрацие ипащэу Шъэо Аскэр, Парламентым идепутатхэу Шэуджэн Сэфэр, Джастэ Вячеслав, ПщыукI Алый, Олег Картамышевыр, Северскэ районым и Новодмитриевскэ псэупIэ кой ипащэу Игорь Головиныр.
Мы илъэсым ищылэ мазэ Владимир Нарожнэр зипэщэ лIыкIо купыр мы саугъэтыр зыдэщыIэм кIогъагъэ, изытет къызэрагъэлъэгъуи, ар гъэкIэжьыгъэнэу, чIыпIэу къызэлъиубытырэр зэтегъэпсыхьэгъэнэу щызэдаштэгъагъ.
Ар гъэцэкIэгъэным пае нэужым саугъэтым къызэлъиубытырэ чIыгур къагъэнэфагъ, ар зэрэгъэпсыгъэщтым иэскиз арагъэшIыгъ, мылъкоу зэпстэумкIи пэIухьащтыр зэрагъэшIагъ. Тарихъ псэуалъэм игъэкIэжьын Адыгеим и Парламент идепутатхэр ары зишIушIагъэр. IофшIэнхэр зэрэзэшIуахыхэрэм зынаIэ тетыщтхэр Шэуджэн Сэфэррэ ДзэлI Аскэррэ. Бжыхьэу къакIорэм шIомыкIэу зэпстэури аухынэу ары зэрагъэнэфагъэр.
Зэхэсыгъом саугъэтыр тарихъ-культурнэ кIэным хэхьэрэ псэуалъэхэм яреестрэ хэтыным епхыгъэ Iофхэм щатегущыIагъэх. Ар зэшIохыгъэ зыхъукIэ, тарихъ псэуалъэм икъызэтегъэнэжьын нахь IэшIэх зэрэхъущтыр къэгущыIагъэхэм къыхагъэщыгъ.
— Бзыикъо заом епхыгъэ хъугъэ-шIэгъэ тхьамыкIагъоу адыгэ лъэпкъым къызэпичыгъэхэм ауж сыд фэдиз тешIагъэми, блэкIыгъэм хэукъоныгъэу ашIыгъагъэхэм къамыгъэзэжьыным фэшI ахэр тщыгъупшэхэ хъущтэп, ащ хэкIодагъэхэм яшIэжь гъэпытэгъэныр зэкIэми типшъэрылъ. Тарихъ шIэжьыр ары лъэпкъ зэфэшъхьафыбэу тиреспубликэ исхэм шъхьэкIэфэныгъэ азыфагу илъыным, щэIагъэ зэфыряIэным, зыкIыныгъэ ахэлъыным фэIорышIэрэр. Саугъэтыр зыфагъэуцугъэм хэшIыкI фызиIэхэу, зыгъэлъапIэхэу, Новодмитриевскэ псэупIэ коим ис кIэлэеджакIохэу ащ екIуалIэхэрэм, зыгъэкъабзэхэрэм тафэраз, «тхьашъуегъэпсэу» ятэIо, — къыIуагъ Владимир Нарожнэм.
Бзыикъо заор илъэс 220-кIэ узэкIэIэбэжьмэ псыхъоу Бзыикъо дэжь щыкIуагъ. Ащ шапсыгъэхэри, бжъэдыгъухэри, къэзэкъхэри хэкIодагъэх. Ахэм апае саугъэтыр Адыгеим щыщхэу Емыж Руслъан, ЛIыIужъу Аскэр, Бэрэтэрэ Хьисэ, нэмыкIхэм яшIушIагъэкIэ я 80-рэ илъэсхэм агъэуцугъ. Мыекъуапэ искульпторэу Антон Шикоян ащ иавторыр.
ХЪУТ Нэфсэт.