КIэлэцIыкIухэр агъэгушIуагъэх
Унагъом, шIулъэгъум, шъыпкъэныгъэм я Мафэ ипэгъокIэу АР-м хэгъэгу кIоцI IофхэмкIэ и Министерствэ иIофышIэхэр кIэлэцIыкIухэмрэ зихэхъогъухэмрэ зычIэсхэ социальнэ IыгъыпIэу «Онджэкъ» зыфиIорэм щыIагъэх.
[caption id="attachment_135798" align="aligncenter" width="800"] АР-м хэгъэгу кIоцI IофхэмкIэ и Министерств.[/caption]
Ар зыныбжь имыкъугъэу щыIэныгъэм чIыпIэ къин ригъэуцуагъэхэм IэпыIэгъу ятыгъэным фэгъэзагъ, Мыекъопэ районым ит псэупIэу Каменномостскэр ары зыдэтыр. Ащ кIогъагъэхэр министерствэм хъызмэт IофхэмкIэ ыкIи фэIо-фашIэхэм ягъэцэкIэнкIэ фэгъэзэгъэ Гупчэм иIофышIэхэу Наталья Щербина, Юлия Воропаевар, Татьяна Сахно, Даур Бэл, Ирина Урвачевар, Юлия Душко, медикэ-санитарнэ частым хэтхэу Галина Моторинар, Елена Жаворонковар ыкIи Наталья Заволокинар.
Мы уахътэм IыгъыпIэм илъэси 4 — 16 аныбжьэу нэбгырэ 26-рэ чIэс. Бзылъфыгъэу кIуагъэхэм IэшIу-IушIухэр, джэгуалъэхэр, творчествэм пылъынхэм пае ящыкIагъэхэр шIухьафтынэу афащагъэх. КIэлэцIыкIухэмрэ зихэхъогъухэмрэ лъэшэу къащыгушIукIыгъэх, ягъэхъагъэхэмкIэ къадэгощагъэх, зыгъэпсэфыгъо уахътэр зэрагъакIорэр къафаIотагъ.
IыгъыпIэм ипащэ пIуныгъэ IофшIэнымкIэ игуадзэу Ольга Котляровам къызэриIуагъэмкIэ, ащ фэдэ зэIукIэгъухэр сыдигъокIи кIэлэцIыкIухэм ашIогъэшIэгъоных. Полицием хэтхэр апэрэп ахэм зэряхьакIэхэр. Спорт ыкIи патриотическэ Iофтхьэбзэ зэфэшъхьафхэр, мэфэкI зэхахьэхэр афызэхащэх, хэгъэгу кIоцI IофхэмкIэ отделым иIофышIэхэм республикэм икультурнэ чIыпIэхэр кIэлэцIыкIухэм арагъэлъэгъух, чылысым ащэх, къушъхьэ псыкъефэххэр къарагъэкIухьэх.
КIэлэцIыкIухэм Iофэу адашIэрэм шIогъэ ин зэрэхэлъыр къыхигъэщыгъ хэгъэгу кIоцI IофхэмкIэ Министерствэм иобщественнэ Совет хэтэу Светлана Дорошенкэм. Ари мы Iофтхьабзэм хэлэжьагъ.
ЗэIукIэгъум икIэухым полицием хэт бзылъфыгъэхэр гухахъо хагъуатэу языгъэпсэфыгъо агъэкIонэу кIэлэцIыкIухэм афэлъэIуагъэх. Ащ иджэуапэу IыгъыпIэм ипащэхэм уахътэ къыхагъэкIи кIэлэцIыкIухэм адэжь зэрэкIуагъэхэм пае «тхьашъуегъэпсэу» къараIуагъ.