УплъэкIунхэр макIох
Инэм игъогубгъухэм сатыу зэращашIырэм хэбзэ икъу хэлъхьэгъэнымкIэ пшъэрылъэу Адыгэ Республикэм и ЛIышъхьэ афишIыгъэм игъэцэкIэн джыдэдэм ыуж итых. Анахьэу анаIэ зытырагъэтырэр хы ШIуцIэм екIурэ гъогоу А-146-м щыщ Iахьыр ары.
Къэлэ псэупIэм иадминистрацие къызэритыгъэмкIэ, АР-м и МВД Тэхъутэмыкъое районымкIэ иотделение иIофышIэхэмрэ Инэм къэлэ псэупIэм иадминистрацие илIыкIохэмрэ хэбзэнчъэу Iоф зышIэрэ сатыушIыпIэхэм якъыхэгъэщынкIэ уплъэкIунхэр зэхащэх.
— Гъогубгъухэм псэуалъэу аIутын алъэкIыщтхэр гъогухэм ящынэгъончъагъэ зэрар фэмыхъухэрэр ары. Гъомылэпхъэ лъэпкъхэр зыщэхэрэм санитар шапхъэхэр дэх имыIэу къыдалъытэн фае, — къаIуагъ Инэм иадминистрацие иIофышIэхэм.
Къэлэ псэупIэм иадминистрацие бизнесменхэм къяджагъ ятучан Iупэхэм ягъэкъэбзэн къыхэлэжьэнхэу.
— Гъогоу А-146-мкIэ хы ШIуцIэ Iушъом зыщызыгъэпсэфынэу кIохэрэм Инэм зэпачы. Ахэм Адыгэ Республикэр агу къызэринэжьыщтыр зэлъытыгъэр типсэупIэ зэрэзэтегъэпсыхьагъэмрэ икъэбзагъэрэ ары, — къыщаIуагъ къэлэ псэупIэм иадминистрацие.