ПсэупIэу Дахъо пэблагъэу, псыхъоу Шъхьэгуащэ ыкIыбкIэ, «ДжэгуакIом игъэхъун» зыфаIорэм зекIо-зыгъэпсэфыпIэ комплекс зэхэт къыщашIыщт, ащ чIыгу гектар 200 фэдиз ыубытыщт.

Этнографическэ паркыр Адыгеим щыпсэурэ цIыфхэм якIуапIэ хъущт, лъэпкъ фестивальхэр ащ щырагъэкIокIыщтых, зекIохэм, хьакIэхэм зыщагъэпсэфыщт.

Адыгеим и ЛIышъхьэу КъумпIыл Му­рат аужырэ илъэсхэм адыгэ къуаем ифестивальхэр зыщызэхащэхэзэ ашIыщт чIыпIэ тегъэпсыхьагъэ къыхахыным ынаIэ тетыгъ ыкIи къыдэ­хъугъ.

Гъэхъунэм адыгэхэм ящагу-хапIэхэр зыфэдагъэхэм атехыгъэ псэуалъэхэр щагъэуцущтых, ермэлыкъхэр зыщызэхащэщтхэ чIыпIэр, IэпэIасэхэм яIэшIагъэхэр къызщагъэлъэгъощт мастерскойхэр, лъэпкъ шхынхэр зыщаупщэрыхьащтхэ кафехэр, нэмыкIхэри щагъэпсыщтых.

ЗыгъэпсэфыпIэ зэхэтым ишIын къызаухыкIэ, адыгэ къуаем ифестивалэу илъэс къэс зэхащэрэр мыщ щырагъэ­кIокIызэ ашIыщт.Паркым ичIыналъэ адыгэ чылэ ща­шIыщт.

Мы лъэхъаным ащ иинфраструктурэ игъэпсын рагъэжьагъ. «Россети-Кубань» ипресс-къулыкъу къызэриIорэмкIэ, ащ икъутамэу Адыгеим щыIэм иэнергетикхэм зыгъэпсэфыпIэ комплексым электричествэм икъещэлIэн Iоф дашIэ.

Этнографическэ паркыр къэбгъэнэфыным пае бэ шIэгъэн фаер. Подстанциеу «Даховскэм» электричествэр къыхащыным ищыкIэгъэ IофшIэнхэр агъэцэкIэщтых, электрорыкIуапIэхэр километриплI икIыхьагъэу къакъудыищтых, ахэр зыпышIэгъэщт пкъэухэр агъэуцущтых.

Непэ ехъулIэу проектнэ-изыскательнэ IофшIэнхэр аухыгъэх, электричествэр къызыхащыщтыр зыдагъэуцущт чIыпIэр къыхахыгъ, электроэнергиер къызэра­тIупщыщтымкIэ зэзэгъыныгъэ зэда­шIыгъ.

ЗекIон-рекреационнэ комплексым иинфраструктурэ Iоныгъо мазэм нэс агъэпсынэу тыраубытагъ.