Апэрэ хьисап мастерской ин Адыгэ къэралыгъо университетым къыщызэIуахыгъ. Ащ игъэцэ­кIэн хэлажьэх студент нэбгыэ 12, ахэр Адыгеим ит апшъэрэ еджэпIи­тIум ачIэсых ыкIи Краснодар краим щыщых.

ИТ лъэныкъом фэгъэзэгъэ кIэлэеджакIохэу ыкIи студентхэу колледжхэмрэ университетхэмрэ аще­джэхэрэм апае мастерскоир зэхащагъ. ТхьамэфитIум къыкIоцI командэхэр зэ­нэкъокъущтых, ушэтын, технологическэ ыкIи методологическэ хьисапхэр къашIыщтых. Хьисап проектхэр наукэм, гъэсэны­гъэм е индустрием ащылажьэхэрэм къагъэнэфагъэхэу щытых.

АКъУ-м и Кавказ хьисап гупчэ яIэпыIэгъоу мы проектыр Мыекъуапэ щагъэцакIэ.

— Мастерской иныр зэхэтэщэ. Ар тэркIэ Iоф­шIэныкIэу щыт. Проектым ипшъэрылъ шъхьаIэр университетым ицифрэ сервисхэм адэлэжьэгъэныр ыкIи кIэхэр зэхэгъэуцо­гъэнхэр ары. Iофхэр зэрэ­лъыкIуатэхэрэм теплъынышъ, щыкIагъэу фэхъухэ­рэр дэдгъэзыжьынхэшъ, къэкIощт илъэсым индуст­рие зэфэшъхьафхэм ащы­лажьэхэрэм язаказхэр дгъэцакIэхэу едгъэжьэщт, — къыIотагъ Iофтхьабзэм игъэцэкIэкIо комитет илIыкIоу ПсыIушъо Азамат.

Командэмэ хьисапищ агъэцэкIэнэу щытыр: скан­теплъэхэмкIэ къэбарэу къаIэкIахьэрэм елъытыгъэу web-шапхъэхэр автома­тизацие шIыкIэм тетэу аушъэнхэр, ахэмкIэ лъэныкъо пчъагъэу щыIэр зэхагъэуцоныр; чIыпIэм елъытыгъэу электротранспорт цIыкIум пае заряднэ станциехэм къякIущт схе­мэр гъэпсыгъэныр, ахэр электричествэр зэрыкIорэ линиехэм апэчыжьэхэмэ, агъэкIэжьырэ энергиер афагъэфедэнэу; социологическэ уплъэкIунхэу охътэ зэфэшъхьафхэм аудиторие пчъагъэхэм ащырагъэкIокIыхэрэр автоматическэ зэфэхьысыжь зы­шIыщт цифрэ Iэмэ-псымэр зэхэгъэуцогъэныр.

Пчэдыжьым сыхьатыр 10-м къыщегъэжьагъэу пчыхьэм сыхьатыр 7-м нэс мастерскоим Iоф ешIэ. Ащ къыдыхэлъытагъэх культурнэ, гъэсэныгъэ программэхэр ыкIи командэ гъэсэныгъэм фэгъэхьыгъэ тренингхэр.

Хьисап мастерской иным хэлажьэрэмэ яIэпэ­Iэсэныгъэ хагъэхъон алъэ­кIы, ИТ-сервисхэм язэхэгъэуцон аIэ къырагъахьэ, проект зэфэшъхьафхэр ежь ашъхьэкIэ зэхагъэуцох. IофшIэгъэ дэгъухэр зиIэхэу къахагъэщырэ сту­дентхэм сертификатхэр ыкIи шIухьафтынхэр аратыщтых. Сертификатхэм яшIуагъэкIэ студентхэр нэ­мыкI зэнэкъокъумэ ахэ­лэжьэнхэ алъэкIыщт.

Мыщ фэдэ мастерской­хэр джырэ уахътэм Новосибирскэ ыкIи Томскэ къэралыгъо университетхэм яIэх. Проектыр лъэныкъуабэхэм алъэIэсы: абстрактнэ хьисапыр, алго­ритмыр ыкIи оптимиза­циер, машиннэ гъэсэны­гъэр, организациехэм про­ектхэр ащыгъэIорышIэгъэн­хэр ыкIи нэмыкIыбэ­хэр. Проектым фэгъэ­хьы­гъэ къэбарыр нахь игъэ­кIо­ты­гъэу мы сайтым ижъугъо­тэн шъулъэкIыщт: https://bmm2023.mca.nsu.ru/.

Адыгэ къэралыгъо университетым ипресс-къулыкъу.