Кавказ къэралыгъо биосфернэ заповедникым шIэныгъэ къыозытырэ зекIоным зыщегъэушъомбгъугъэнымкIэ амалэу иIэр бэ. Ахэм ащыщ лъэгъуабэр Адыгеим щаублэ.

Аужырэ илъэсхэм зыгъэпсэфакIо къакIохэрэм япчъагъэ къыхэхъо, экотуризмэм хэхъоныгъэхэр ешIых. Арэущтэу щытми, заповедникым къа­кIо­хэрэр нахьыбэ къэс, иэкосистемэ зэрар рахын зэрилъэкIыщтыр шIэныгъэлэжьхэм хагъэу­нэфыкIы. Ар зытехъухьэрэм ыкIи Iофыгъом хэкIыпIэу иIэхэм щатегущыIагъэх цIыф гъэса­гъэхэу, зекIозещэхэу зичэзыу Iэнэ хъураеу Мые­къуапэ щызэхащагъэм хэлэжьагъэхэр.

Экологие гъэсэныгъэмкIэ методистэу Валентина Куцаям зэрэхигъэунэфыкIыгъэмкIэ, цIыфхэм алъэгъурэ пстэури, къэкIыхэрэри, псэушъхьэхэри ыкIи ежь зекIо къакIохэрэри къэухъумэгъэнхэм пае научнэ уплъэкIунхэр шIыгъэнхэ фае. Просветительскэ зекIоныр зи­кIасэхэу, зипсауныгъэ зыпкъ изыгъэуцожьынэу къакIохэрэм заповедникым зэрар къыфамыхьыным фэшI зыдакIохэрэ чIыпIэхэм узэращызекIонэу щыт шапхъэхэр ябгъэшIэнхэ, къа­кIо­хэрэм уалъып­лъэн фае.

Ахэм къатегущыIагъ Кавказ заповедникым ишIэныгъэлэжь IофышIэ шъхьаIэу Сергей Трепет. Ащ фэшъхьафэу методистэу Валентина Куцаямрэ научнэ IофшIэнхэмкIэ заповедникым ипащэ игуадзэу Николай Ескинымрэ докладхэр къашIыгъэх.

ЗэкIэми къыкIагъэтхъыгъ Кавказ биосфернэ заповедникым шIэныгъэ къыозытырэ зекIоныр зэрифэшъуашэу щызэхэщэгъэнымкIэ амалышIухэр зэриIэхэр. Ахэр ыгъэфедэнхэм ыкIи зыIэкIимыгъэкIынхэм, зыфэдэ щымыIэ чIыпIэ къа­бзэхэр къызэтегъэнэгъэнхэм апае хэбзэгъэуцугъэу щыIэхэр хэти ыгъэцэкIэнхэ фае.

Валентина Куцаям къызэри­IуагъэмкIэ, мы лъэхъаным зе­кIоным пылъ IофшIэнхэр лъа­гъэкIотэнхэм фэшI зекIозещэ­хэм, инструкторхэм, экскурсоводхэм адэлажьэх, мыщ Iоф щызышIэщт лэжакIохэр агъэ­хьазырых.

Волонтерхэр яIэпыIэгъух, ахэм япроектхэр лъагъэкIуатэх. ЧIыпIэ къабзэхэу заповедникхэмрэ лъэпкъ паркхэмрэ къызэлъаубытыхэрэм шIэныгъэ къэзытырэ зекIоныр ащызэхащэн фитэу унашъо зышIыгъэр Урысые Федерацием и Президентэу Владимир Путиныр ары.