ЦIыфхэм ядаохэм ахэплъагъэх
Монополием пэшIуекIорэ федеральнэ къулыкъум и ГъэIорышIапIэу Адыгеим щыIэм щызэхэщэгъэ Общественнэ советым иIэгъэ зэхэсыгъом коммунальнэ фэIо-фашIэхэр зыгъэцэкIэрэ организациеу Адыгеим Iоф щызышIэхэрэм алъэныкъокIэ цIыфхэм даоу къатыгъэхэр щызэхафыгъэх.
Мы Iофыгъом идэгъэзыжьын тегущыIэхэзэ, Общественнэ советым епхыгъэу ащ Iоф дэзышIэщт IофшIэкIо купыр агъэнэфагъ.
Iофтхьабзэм хэлэжьагъэх «Россети Кубань» илIыкIо, Адыгэ электрическэ сетьхэм якъутамэ ипащэ, «ТНС Энерго Кубань» зыфиIорэм идиректор, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Майкопская ТЭЦ» ыкIи АР-м ипсэупIэ инспекцие яIофышIэхэр.
Iофтхьабзэм зыщытегущыIагъэхэр: Адыгеим ирайонхэм ащыщхэм электричествэр бэрэ зэрэщагъэкIуасэрэр, электричествэу аIэкIагъахьэрэм кIуачIэу иIэм цIыфхэр зэримыгъэразэхэрэр, ащ ыпкIэу атырэм ибагъ, нэмыкIхэри.
Монополием пэшIуекIорэ федеральнэ къулыкъум и ГъэIорышIапIэу АР-м щыIэм ипащэу ХьапэкIэ Аслъан къызэриIуагъэмкIэ, пшъэрылъэу яIэхэм ащыщ монополием пэшIуекIорэ къулыкъум, фэIо-фашIэхэр зыгъэцэкIэрэ организациехэм яIофшIэн зэIухыгъэу щытыныр.
ГъэIорышIапIэм епхыгъэу Iоф зышIэрэ Общественнэ советым итхьаматэу Сергей Пастернак пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Майкопская ТЭЦ» зыфиIорэм фигъэпытагъ ошIэ-дэмышIэ Iоф къэхъумэ, дисперческэ къулыкъум иIофшIэн нахь ыгъэлъэшынэу.
Общественнэ советым хэтхэм яупчIабэ сетевой компаниехэм афагъэзагъэх. Ахэм ащыщ электричествэр бэрэ зэрагъэкIуасэрэм ыкIи ащ кIуачIэу иIэм зэримыгъэразэхэрэм къахэкIэу электроэнергиекIэ Iоф зышIэрэ пкъыгъохэр бэрэ зэрэкъутэхэрэр.
Адыгэ электрическэ сетьхэм ятхьаматэу Дмитрий Рязанцевым къызэриIуагъэмкIэ, ежьхэм ялажьэ хэлъэу къутэгъэ электрическэ приборхэм алъэныкъокIэ хъугъэ-шIагъэ пэпчъ зэхафыным ыкIи хьыкумым иунашъо хэлъэу гумэкIыгъор дагъэзыжьыным фэхьазырых.
2023-рэ илъэсым къыкIоцI Общественнэ советым хэтхэм коммунальнэ фэIо-фашIэхэм япхыгъэ упчIэхэм афэгъэхьыгъэу джыри Iофыгъо зэфэшъхьафхэр зэхафынхэу рахъухьагъ.