Урысыем хэгъэгу кIоцI IофхэмкIэ и Министерствэ экономикэ щы­нэ­гъончъэнымкIэ ыкIи къолъхьэ тын­-Iыхыным пэшIуекIогъэнымкIэ иотде­лэу Мыекъопэ районым щыIэм икъулыкъушIэхэм Адыгеим иследст­веннэ Комитет, республикэ прокуратурэм, джащ фэдэу Росгвардием иподраз­делениеу СОБР-м якъулыкъушIэхэр ягъусэхэу хэбзэнчъэу джэгупIэ чIыпIэхэр зыгъэлажьэщтыгъэ бзэджэшIэ купыр къаубытыгъ.

ЗэрагъэунэфыгъэмкIэ, 2022-рэ илъэсым зэхэубытэгъэ бзэджэшIэ купым, Адыгеим щыщхэу илъэс 27-м къыщыублагъэу 64-м нэс зыныбжь нэбгыриплI ащ хэт, ашIэзэ ахъщэ къагъэхъэн мурад яIэу хэбзэнчъэу джэгупIэ чIыпIэхэр ыгъэпсыгъэх.

ДжэгупIэ чIыпIитIур Мые­къопэ районым ит поселкэу Тульскэм дэтыгъэх. Зэгуцэ­фэ­хэрэ зэхэщакIом зэрыджэ­гущтхэ техникэр къыщэфыгъэу ахэм алъыплъэщт операторищмэ Iоф ари­гъашIэщтыгъ.

Хэбзэнчъэу Iоф зышIэрэ клубхэр ыкIи ежь зэхэщакIохэм япсэупIэхэр хэбзэу­хъумэкIо къулыкъушIэхэм къыза­лъыхъум, компьютерхэр, телефонхэр, банк картэхэр, планшетхэр, документхэр ыкIи ахъщэхэр къачIахыгъэх.

Мы IофымкIэ следственнэ къулыкъум уголовнэ Iоф къызэIуихыгъ. БзэджэшIэ купыр къаубытыгъэу изоляторым чIэс. Мыекъопэ районым иполи- цие икъулыкъушIэхэм уголовнэ Iофым изэхэфынкIэ Iофтхьэ­бзэ гъэнэфагъэхэр зэрахьэх.