Адыгэ Республикэм чIэнэгъэшхо ышIыгъ. Со­вет­скэ IофышIэу, урысые дзэ къулыкъушIэу, генерал-майорэу Брыцу Валерэ Мыхьамод ыкъом ыныбжь илъэс 80-м итэу идунай ыхъожьыгъ.

Брыцу Валерэ Мыхьамод ыкъор Адыгэ автоном хэкумкIэ къуаджэу Хьа­кIэмзые 1943-рэ илъэ­сым Iоныгъом и 10-м къыщы­хъугъ. 1961-рэ илъэсым дзэ къулыкъум ащагъ, 1964-рэ илъэсым Ульяновскэ ап­шъэрэ дзэ-техническэ училищыр, 1977-рэ илъэсым тылымкIэ ыкIи транспортымкIэ дзэ Академием икоманднэ-тыловой факультет къыухыгъэх.

Илъэс 35-м къыкIоцI В. М. Брыцур пэщэ IэнэтIэ зэфэшъхьафхэм аIутыгъ, стратегическэ мэхьанэ зиIэ ракетыдзэхэм ятыл ипащэ игодзагъ, ыужкIэ штабым ипэщагъ, стратегическэ мэхьанэ зиIэ ракетыдзэхэм ятыл ипащэ иапэрэ годзагъ.

Брыцу Валерэ орденэу «За службу Родине в Вооруженных Силах СССР» зыфиIоу я 3-рэ шъуашэ зиIэр, медалэу «За безупречную службу» зыфиIоу а 1-рэ, я 2-рэ, я 3-рэ шъуашэхэр зиIэхэр ыкIи нэмыкIхэр къыфагъэшъошагъэх.

1996-рэ илъэсым дзэм къызыхэкIыжьым, В.М. Брыцум Адыгэ Республикэм зыкъэухъумэжьынымкIэ ыкIи ошIэ-дэмышIэ IофхэмкIэ и Комитетэу нэужым Министерствэ ашIыжьыгъа­гъэм итхьаматэ иапэрэ гуадзэу Iоф ышIагъ.

Мы IэнэтIэшхом Iотыфэ тиреспубликэ ипредприятиехэми, исоциальнэ лъэныкъуи зэпыу ямыIэу Iоф ашIэнымкIэ бэ зэлъытыгъэгъэ къулыкъур шIуагъэ къытэу лэжьэнымкIэ Брыцу Валерэ бэ ышIагъэр.

Адыгэ Республикэми, нэмыкI чIыпIэхэми В. М. Брыцур зэрэщашIэщтыгъэр зиIорэ зишIэрэ зэтефэжьыщтыгъэ, шъып­къэныгъэшхорэ Iэдэб инрэ зыхэлъыгъэ, пшъэдэкIыжьэу ыхьырэр икъоу къызыгурыIощтыгъэ цIыфэу ары. ИIофшIэгъугъэхэми, Адыгеим исхэми, общественнэ организацие, лъэпкъ-культурэ объединение зэфэшъхьафхэми ащ лъытэныгъэшхо къыфашIыщтыгъ.

Iоф дэзышIагъэхэми, иныбджэгъухэми, зышIэщтыгъэ пстэуми Брыцу Валерэ ренэу шIукIэ агу илъыщт.

Зидунай зыхъожьыгъэм иунагъорэ иIахьылхэмрэ тафэтхьаусыхэ.

М. Къ. КъумпIыл, В. И. Нарожный, А. А. КIэращ, М. Къ. Хъопсэрыкъу, А. В. Наролин, В. М. Резник, М. Р. Хьасанэкъу, В. П. Свеженец, А. В. Аверин, С. В. Илющенко, З. А. Хьамырз, А. А. Къуаджэ, Ю. Ф. Щепин, А. А. Дорофеев, Ю. Н. Калягин, Н. М. ГъукIэлI

Адыгэ Республикэм заом, IофшIэным, УIэшыгъэ КIуачIэхэм ыкIи хэбзэухъумэкIо къулыкъухэм яветеранхэм (пенсионерхэм) я Совет, ветеранхэм IэпыIэгъу афэхъурэ республикэ фондэу «ТекIоныгъ» зыфиIоу Советскэ Союзым и ЛIыхъужъэу Хъ. Б. Андырхъуаем ыцIэ зыхьырэм, Адыгэ Республикэм инахьыжъхэм я Совет лъэшэу гухэкI ащыхъугъ генерал-майорэу, дзэ къулыкъум иветеранэу Брыцу Валерэ Мыхьамод ыкъом идунай зэрихъожьыгъэр ыкIи щымыIэжьым иунагъорэ иIахьылхэмрэ афэтхьаусыхэх.

Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ лъэшэу гухэкI ащыхъоу Адыгэ Республикэм хэдзынхэмкIэ и Гупчэ комиссие и Тхьаматэу Сэмэгу Нурбый Амэрбый ыкъом фэтхьаусыхэх ишъхьэгъусэ идунай зэрихъожьыгъэм фэшI.

Адыгэ Республикэм и Къэралыгъо Совет – Хасэм идепутатхэр лъэшэу гухэкI ащыхъоу Адыгэ Республикэм хэдзынхэмкIэ и Гупчэ комиссие и Тхьаматэу, ящэнэрэ, яплIэнэрэ, ятфэнэрэ зэIугъэкIэгъухэмкIэ Адыгэ Республикэм и Къэралыгъо Совет – Хасэм идепутатыгъэу Сэмэгу Нурбый Амэрбый ыкъом фэтхьаусыхэх ишъхьэгъусэ идунай зэрихъожьыгъэм фэшI.