ЦIыфхэр ахэкIодагъэх
Бэдзэогъум и 9-м чэщым сыхьатыр 11-хэм адэжь Урысыем хэгъэгу кIоцI IофхэмкIэ и Министерствэ имежмуниципальнэ отделэу «Кощхьаблэм» иполицие къэбар къыIэкIэхьагъ Шэуджэн районым ит поселкэу Заревэм пхырыкIырэ автомобиль гъогум хъугъэ-шIэгъэ хьылъэ къыщыхъугъэу.
ПэшIорыгъэшъэу зэрагъэунэфыгъэмкIэ, Ставрополь краим щыпсэурэ хъулъфыгъэм автомобилэу «Грантэр» ыгъэIорышIэзэ игъогу къытекIи, гъогу шъхьаIэм тетэу къачъэщтыгъэ автомобилэу «Ауди» зыфиIорэр блимыгъэкIэу еутэкIыгъ.
«Грантэм» исыгъэ нэбгыритфым щыщэу 3-мэ (хъулъфыгъэм, бзылъфыгъэм ыкIи илъэси 8 зыныбжь пшъэшъжъыем) IэпыIэгъу псынкIэр къэмысызэ ядунай ахъожьыгъ. Мы машинэм исыгъэ адрэ кIэлэцIыкIуитIур IэпыIэгъу псынкIэмкIэ республикэ кIэлэцIыкIу клиническэ сымэджэщым нагъэсыгъэх. Джащ фэдэу IэкIыбым къыщашIыгъэ автомобилым иводитель сымэджэщым ащагъ. ЗэкIэми ящыкIэгъэ IэпыIэгъу псынкIэр арагъэгъотыгъ.
Следственнэ-оперативнэ купым ыкIи Къэралыгъо автоинспекцием икъулыкъушIэхэм зэхэфын Iофтхьабзэхэр рагъэкIокIых, ахэр зэрэкIохэрэм лъэплъэ Шэуджэн районым ипрокуратурэ.
Непэ, тигъэзет къызщыдэкIыщт уахътэм, пчыхьэм сыхьатыр 5-м ехъулIэу мы гъогу хъугъэ-шIагъэм ыпкъ къикIэу псаоу къэнагъэхэу сымэджэщым чIэлъхэм япсауныгъэ изытет зыщыдгъэгъозагъ. КIэлэцIыкIу республикэ клиническэ сымэджэщым иврач шъхьаIэу Гъогъо Жаннэ къызэрэтиIуагъэмкIэ, кIэлэцIыкIухэм япсауныгъэкIэ зыпари щынагъо щыIэп. Тыгъоспчэдыжь ахэр реанимацием къыращыжьхи, шъобжхэмкIэ отделением ащагъэх, кIэлэцIыкIухэм яIахьылхэр къэкIуагъэхэу акIэрысых. «Ауди-м» исыгъэ хъулъфыгъэр нейрохирургиемкIэ отделением чIэлъ, изытет хьылъэкIаеу алъытэ.
Теуцожь районми непэ гъогу хъугъэ- шIагъэ къыщыхъугъ, ащ зы нэбгырэ хэкIодагъ, 7-мэ шъобжхэр хахыгъэх. Ар къызщыхъугъэр Хьэлъэкъуае дэжь. Илъэс 41-рэ зыныбжь хъулъфыгъэу Краснодар краим щыпсэурэм машинэр фэмыгъэIорышIэу, ыпэкIэ къикIыхэрэр къызэрычъэхэрэ гъогум телъэдагъ, IэкIыбым къыщашIыгъэ автомобилыр зезыфэщтыгъэ хъулъфыгъэу Джэджэ районым щыщэу илъэс 65-рэ зыныбжьыр зыкIэрысым еуагъ. Краим щыщ хъулъфыгъэм джа чIыпIэм ыпсэ щыхэкIыгъ, ащ дисыгъэ Iэтахъохэу илъэс 11 ыкIи 13 зыныбжьхэр, ятIонэрэ машинэм исыгъэ бзылъфыгъэу илъэс 20 зыныбжьыр Мыекъопэ сымэджэщым ащагъэх. Мыхэм анэмыкIэу джыри нэбгыриплIэу машинэхэм арысыгъэхэм даохэр яIэхэу зарагъэуплъэкIунэу къыкIэлъэIугъэх. Зэхэфынхэр макIох.