Бэдзэогъум и 8-м Дунэе Адыгэ Хасэм и ГъэцэкIэкIо куп изэхэсыгъо Мыекъуапэ щыкIуагъ. Адыгеим, Къэбэртэе-Бэлъкъарым, Къэрэщэе-Щэрджэсым, хы ШIуцIэ Iушъом щыпсэурэ шапсыгъэхэр, Ставрополь краим, Израиль, Сирием къарыкIыгъэ лIыкIо купхэр ащ хэлэжьагъэх.

[caption id="attachment_135683" align="aligncenter" width="800"] Егор Сергеев.[/caption]

Зичэзыу зэхэсыгъор анахьэу зыфэгъэхьыгъагъэр Дунэе Адыгэ Хасэм мы илъэсым имэзихэу пыкIыгъэм Iофэу ышIагъэм изэ­фэхьысыжь, адыгабзэм изэгъэшIэнкIэ джырэ лъэхъаным ди­штэрэ шIыкIэ амалхэр къэгъотыгъэнхэр, ДАХ-м и Устав зэхъо­кIыныгъэхэр фэшIыгъэнхэр ыкIи Iоныгъом и 19 — 20-м Дунэе Адыгэ Хасэм и Конгрессэу Налщык щыкIощтым изэхэщэн.

2023-рэ илъэсым имэзих ДАХ-м зэшIуихыгъэ IофшIэнхэм къатегущыIагъ ащ итхьаматэу Сэхъурэкъо Хьаути. Ащ ипэублэ псалъэ зэрэщыхигъэунэфыкIы­гъэмкIэ, непэ зэрэдунаеу зыгъэ­гумэкIырэ Iофыгъохэу Украинэм щыкIохэрэм апкъ къикIыкIэ къэралыгъом илъ рэхьатныгъэр зэщыкъуагъэ мыхъуным, цIыфхэм язэкъотныгъэ, мамырныгъэр гъэпытэгъэнхэм афэшI дунэе зэдэлэжьэныгъэм зегъэушъом­бгъугъэн фае. Лъэпкъ зэгурыIоныгъэр ыкIи мамырныгъэр къызэтегъэнэгъэнхэмкIэ общественнэ организациехэм мэхьанэшхо зэряIэр Хь. Сэхъурэкъом къыхигъэщыгъ. ХэушъхьафыкIыгъэ дзэ операцием хэлажьэхэрэм лъэныкъо пстэуми къарыкIэу шIушIэ IэпыIэгъур зэпымыоу афарагъащэ, ДАХ-м иIахьышIуи зэрэфэлъэкIэу ащ хелъхьэ.

— Къыхэзгъэщымэ сшIоигъу, Президент грантхэм я Фонд зэхищэгъэ зэнэкъокъум мыгъи яплIэнэрэу ДАХ-м текIоныгъэр къыщыдихыгъ. Мы уахътэм 2023 — 2024-рэ илъэсхэм ателъытэгъэ проектэу лъэпкъ зыкIыныгъэм ыкIи патриотизмэм афэгъэхьыгъэр пхырытэщы. Мыщ къыды­хэлъытагъэх общественнэ культурнэ форумыр, тилъэпкъэгъухэу IэкIыб къэралыгъохэм ащыпсэухэрэм адыгабзэр ыкIи урысыбзэр пэIудзыгъэ шIыкIэм тетэу ягъэшIэгъэныр, адыгабзэм икъы­зэтегъэнэгъэн. Проектым кIэух фэхъущт тхылъ къыдэгъэкIыгъэныр, — къыIуагъ Хь. Сэхъурэ­къом.

[caption id="attachment_135682" align="aligncenter" width="800"] Егор Сергеев.[/caption]

Джащ фэдэу ДАХ-м игъэкIотыгъэ зэхэсыгъохэу Налщык, хы ШIуцIэ Iушъом ащызэхищагъэхэм игъэкIотыгъэу къатегущыIагъ. АнаIэ зытырадзагъэхэм ащыщ тилъэпкъэгъухэу Тыркуем щыпсэухэрэм чIыгусысыным тхьамыкIагъоу къафихьыгъэр. Ахэм IэпыIэгъу ягъэгъотыгъэнымкIэ Дунэе Адыгэ Хасэм хэушъхьафыкIыгъэ счет къызэIуихи, зэкIэ епхыгъэ общественнэ организациехэм ахъщэу къаугъоигъэр ащ ихьагъ. ДАХ-м илIыкIохэр чIыгусысыныр зыщыхъугъэ чIыпIэхэм ащыIагъэх, афэтхьаусыхагъэх, ягухэкI адагощыгъ.

Дунэе Адыгэ Хасэм изэхэсыгъо анахь Iофыгъо шъхьаIэу къыщаIэтыгъэхэм ащыщ адыгабзэм изэгъэшIэн. КъыткIэхъухьэрэ ныбжьыкIэхэм адыгабзэр зэрамышIэрэр гумэкIыгъо дэдэу щыт ыкIи ащкIэ хэкIыпIэу алъэгъу­хэрэм ащыщэу алъытагъ джырэ лъэхъаным диштэу джэгукIэ шъуашэм илъэу телефонхэм арыбгъэхьан плъэкIыщт едзыгъо къэугупшысыгъэныр. Ащ игъэкIотыгъэу къытегущыIагъэх ДАХ-м игъэцэкIэкIо куп хэтхэу Шэуджэн Аминэтрэ Табыщ Муратрэ.

ГущыIэр лъигъэкIотагъ респуб­ликэ общественнэ движениеу «Адыгэ Хасэм» ипащэу ЛIымыщэкъо Рэмэзан.

— ЫпэкIэ тиIэгъэ зэхэсыгъом зэшIотхын фэе пшъэрылъэу зыщыфэдгъэуцугъагъэхэм Iоф адэтшIагъ. Анахьэу адыгабзэм изэгъэшIэн, адыгэ хабзэр тиныб­жьыкIэхэм ахэтлъхьаным фэIорышIэрэ Iофтхьабзэхэр зетхьагъэх. КIэлэцIыкIу IыгъыпIэхэм къащегъэжьагъэу гурыт ыкIи апшъэрэ еджапIэхэм адыгабзэр ачIэлъхьэгъэным епхыгъэу зэIукIэгъубэ зэхэтщагъ, районхэр къэткIухьагъэх. Бзэ зэгъэшIэн гупчэхэм, институтым, гъэсэныгъэмрэ шIэныгъэмрэкIэ Министерствэм, гъэIорышIапIэхэм ялIыкIохэр, кIэлэегъаджэхэр тыугъойхи, адыгабзэр зэрагъэшIэнэу зыкIыфэмыехэм, ар чIэтынэнэу зыкIэхъурэм шъхьэ­ихыгъэу татегущыIагъ. Телефоным, интернетым яягъэ къызэ­рэкIорэр зэкIэми тэшIэ, ащ дакIоу адыгабзэм урылажьэмэ мылъку къэбгъэхъэнэу шIыгъэн зэрэфаем тынаIэ тетыдзагъ. Джащ фэдэу бзитIукIэ лажьэ­хэрэм ахъщэ тедзэхэр афашIы­хэмэ тэрэзэу Хасэм хэтхэр еплъых. Iофыгъоу къэуцухэрэр ыкIи хэ­кIыпIэу тлъэгъухэрэр Адыгеим и ЛIышъхьэ ыкIи Парламентым ятхьылIагъэх, — къы­Iуагъ ЛIымыщэкъо Рэмэзан.

[caption id="attachment_135684" align="aligncenter" width="800"] Егор Сергеев.[/caption]

Дунэе Адыгэ Хасэм изэхэсыгъо Iофыгъо шъхьаIэу зыщыхэплъагъэхэм ащыщ Уставым зэ­хъокIыныгъэхэр фэшIыгъэнхэр. Ар къызхэкIыгъэр общественнэ организациехэм афэгъэхьыгъэ хэбзэгъэуцугъэу тикъэралыгъо иIэм зэхъокIыныгъэхэр зэрэфашIыгъэхэр ары. Джы ащ диштэу тилъэпкъэгъухэу IэкIыб къэралыгъохэм ащыпсэухэрэр ДАХ-м къыхэхьанхэ алъэкIынэу Уставыр дгъэпсыжьыгъэ ыкIи юстициемкIэ Министерствэм щыхэплъэнхэу ар рахьылIагъ.

Джащ фэдэу лъэныкъо зэфэшъхьафхэм афэгъэзэгъэ комитетхэм япащэхэм мэзих зэфэхьысыжьхэр зэхэсыгъом къыщашIыгъэх. ДАХ-м изимычэзыу Конгрессэу бжыхьэм щыIэщтым изэхэщэн епхыгъэ Iофыгъохэм атегущыIагъэх. Ар адыгэм и Мафэ фэгъэхьыгъэщт. Ащ изыфэгъэхьазырын фэгъэзэгъэ зэхэщэкIо комитетыр мы уахътэм анахьэу зыуж итыщтхэм анаIэ тырарагъэдзагъ.

НэмыкI Iофыгъоу зэхэсыгъом къыщаIэтыгъэхэмкIэ унэшъо гъэ­нэфагъэхэр аштагъэх. Дунэе Адыгэ Хасэм иIофшIэн зэригъэцэкIагъэм уигъэрэзэнэу гъэцэкIэкIо купым ылъытагъ. ШIэжь ыкIи мэфэкI мафэхэм яхэгъэунэфыкIын джыри тапэкIэ лъагъэ­кIотэнэу рахъухьагъ. Адыгабзэм изэгъэшIэнкIэ, икъызэтегъэнэнкIэ агъэнэфэгъэ пшъэрылъхэми Iоф адашIэщт.

Iэшъынэ Сусан.