2023-рэ илъэсым атыгъэ зыкI къэралыгъо ушэтынхэм язэфэхьысыжьхэр мы мафэхэм къэнэфагъэх. АдыгеимкIэ нэбгырэ 12-мэ предмет зэфэшъхьафхэмкIэ балли 100 къахьыгъ.

[caption id="attachment_135676" align="aligncenter" width="800"] Къэралыгъо аттестационнэ къулыкъур, АР-м шIэныгъэхэм ахэ­гъэхъогъэнымкIэ иинститут.[/caption]

«ШIэныгъэм ылъэныкъокIэ тиныбжьыкIэхэм гъэхъагъэу ашIыхэрэр, дэгъоу зэреджэхэрэр ыкIи кIэлэ­егъаджэхэм яIофшIэн зэрифэшъуашэу зэрагъэцакIэрэр зыкI къэралыгъо ушэтынхэм къагъэлъагъо. Сыгу къыздеIэу балли 100 къизыхыгъэхэм сафэгушIо, ыпэкIэ гъэхъэгъэшIухэр ашIыхэзэ ящыIэныгъэ гъогу рыкIонхэу, хэти зыфэе апшъэрэ еджапIэм чIэхьанэу афэсэIо», — АР-м и ЛIышъхьэу КъумпIыл Мурат ныбжьыкIэхэм зафигъэзагъ.

ЗыкI къэралыгъо ушэтынхэм предмет зэфэшъхьафхэмкIэ балли 100 къизыхыгъэхэм кIэ­кIэу нэIуасэ шъуафэтшIын.

Алина Дрожжинар Мыекъо­пэ гимназиеу N 5-м щеджагъ, химиемкIэ балли 100 къыхьыгъ. 2021 — 2022-рэ илъэсхэм сэнаущыгъэ ин зыхэлъ ныбжьыкIэхэм IэпыIэгъу афэхъугъэнымкIэ шIухьафтыным илауреат хъугъэ. Илъэс 11-м зэригъэшIэгъэ предметхэмкIэ гъэхъагъэхэр ышIыгъэх. ИщыIэныгъэ гъогу медицинэм рипхынэу рехъухьэ.

[caption id="attachment_135672" align="aligncenter" width="800"] Къэралыгъо аттестационнэ къулыкъур, АР-м шIэныгъэхэм ахэ­гъэхъогъэнымкIэ иинститут.[/caption]

Тыгъушъ Аделинэ лицееу N 34-р къыухыгъ. Еджэныр зикIэсэ пшъэшъэжъыем къин къыщымыхъоу литературэмкIэ балли 100 къырихыгъ. 2023-рэ илъэсым Урысые зэнэкъокъоу «Большая перемена» зыфиIорэм текIоныгъэ къыщыдихыгъ. НэмыкI лъэныкъохэмкIи гъэхъэгъэ­шIухэр иIэх. УрысыбзэмкIэ балл 97-рэ къыхьыгъ. Санкт-Петербург къэралыгъо художественнэ-промышленнэ академием чIэхьан гухэлъ иI.

Мэрэтыкъо Данэ Адыгэ рес­публикэ гимназием щеджагъ, химиемкIэ балли 100 къыхьыгъ. Апэрэ классым къыщегъэжьагъэу «тфы» закIэкIэ еджэ. Еджэ­­ным имызакъоу, еджапIэм щызэхащэрэ Iофтхьабзэхэм ахэлэжьэныр икIэсагъ. Данэ ищыIэныгъэ гъогу медицинэм рипхыщт, кардиохирург хъунэу фай.

Мэри Парсеговам Мыекъопэ гурыт еджапIэу N 15-р къыу­хыгъ. ЛитературэмкIэ анахь балл иныр къылэжьыгъ, урысыбзэмкIэ балл 93-рэ къыхьыгъ. ИцIыкIугъом къыщегъэжьагъэу еджэныр икIас, «тфы» закIэкIэ еджагъ. Телевизионнэ къэтынэу «Умницы и умники» хэлэ­жьагъ, зэрифэшъуашэу зыкъыщи­гъэ­лъэгъуагъ. Москва экономикэмкIэ иапшъэрэ еджапIэ чIахьэ шIоигъу, дизайнер сэнэхьат зэригъэгъотынэу фай.

[caption id="attachment_135674" align="aligncenter" width="800"] Къэралыгъо аттестационнэ къулыкъур, АР-м шIэныгъэхэм ахэ­гъэхъогъэнымкIэ иинститут.[/caption]

Эда Акташ Тэхъутэмыкъое районымкIэ АдыгеякIэм дэт гурыт еджапIэу N 27-р къыу­хыгъ. ЛитературэмкIэ балли 100 къыхьыгъ. Журналист сэнэхьатыр зэригъэгъотыным аужырэ илъэсхэм ишъыпкъэу зыфигъэ­хьазырыгъ.

Людмила Грибенниковар Мыекъопэ районым ит поселкэу Тульскэм дэт гъэсэныгъэ гупчэу N 4-м щеджагъ. ЛитературэмкIэ ащ балли 100 къыдихыгъ. Шъо­лъыр ыкIи урысые творческэ зэнэкъокъухэм пчъагъэрэ зэрифэшъуашэу закъыщигъэлъэгъуагъ. «Поэтика авангарда» зыфиIорэ урысые зэнэкъокъум текIоныгъэ бэмышIэу къыщыдихыгъ.

Самера Оджха Мыекъопэ гимназиеу N 22-р къыухыгъ. УрысыбзэмкIэ балли 100 къы­хьыгъ, «тфы» закIэкIэ еджагъ. Предмет зэфэшъхьафхэмкIэ кIэлэеджакIохэм апае зэхащэрэ олимпиадэхэм илъэс зэкIэлъыкIохэм текIоныгъэр пчъагъэрэ къащыдихыгъ.

[caption id="attachment_135675" align="aligncenter" width="800"] Къэралыгъо аттестационнэ къулыкъур, АР-м шIэныгъэхэм ахэ­гъэхъогъэнымкIэ иинститут.[/caption]

Дарья Ермаковар Красно­гвардейскэ районым ит гимназиеу N 1-м щеджагъ. УрысыбзэмкIэ балли 100 къыхьыгъ. «Тфы» закIэкIэ еджагъ. Урысые движениеу «Юнармия» зыфи­Iорэм хэтыгъ. Москва щыкIогъэ дзэ-спортивнэ зэнэкъокъум хэлэжьагъ, нэмыкI гъэхъагъэхэри иIэх.

Юлия Масел Кощхьэблэ районым ит псэупIэу Вольнэм дэт гурыт еджапIэу N 9-р къыухыгъ. УрысыбзэмкIэ ащ балли 100, литературэмкIэ балл 91-рэ къы­хьыгъ. «Живая классика» зыфиIорэм имуниципальнэ уцугъо текIоныгъэ къыщыдихыгъ. Урысыбзэр нахь игъэкIотыгъэу зэригъэшIэнэу филологиемкIэ факультетым чIэхьанэу фай.

[caption id="attachment_135673" align="aligncenter" width="800"] Къэралыгъо аттестационнэ къулыкъур, АР-м шIэныгъэхэм ахэ­гъэхъогъэнымкIэ иинститут.[/caption]

Алена Кононовам Мыекъуа­пэ дэт лицееу N 8-р къыухыгъ. Профильнэ хьисапымкIэ балли 100 къырихыгъ. Хьисапыр ыкIи программированиер игъэкIотыгъэу зэригъэшIагъ. Республикэ естественнэ-хьисап еджапIэм ыкIи искусствэхэмкIэ еджапIэу N 6-м ишIэныгъэхэм ащыхигъэ­хъуагъ. Лъэныкъо зэфэшъхьаф­хэмкIэ гъэхъэгъэшIу­хэр иIэх.

КъумпIыл Джамбот Мые­къопэ гимназиеу N 22-р къыухыгъ. ИнджылызыбзэмкIэ балли 100 къыхьыгъ. ИцIыкIугъом къыщегъэжьагъэу ишIэныгъэхэмкIэ илэгъухэм къахэщы. Гимназием щызэригъэгъотыгъэ шIэныгъэхэм ямызакъоу, аужырэ илъэсиплIым «Angloclub» зыфиIорэ еджапIэм кIуагъэ. Инджылызыбзэр дэгъу дэдэу ешIэ, ащ нэмыкIэу спортым ишъыпкъэу пылъ, экономикэм ыкIи политикэм афэгъэхьыгъэр зэкIэ шIогъэшIэгъон.

Алла Абалонскаяр станицэу Джаджэм дэт гурыт еджапIэу N 1-м щеджагъ. ОбществознаниемкIэ балли 100, тарихъымкIэ балл 93-рэ, урысыбзэмкIэ балл 91-рэ къыхьыгъ.

ДЕЛЭКЪО Анет.