Социальнэ ахъщэ IэпыIэгъур къызэрэзыIэкIигъэхьагъэм, бюд­жет ахъщэр зэритыгъугъэм афэшI Адыгэ Республикэм щы­псэурэ хъулъфыгъэм уголовнэ Iофэу къыфызэIуахыгъэмкIэ унашъом кIуачIэ иIэ хъугъэ.

ЩынэгъончъэнымкIэ Феде­ральнэ къулыкъум иIофышIэ­хэм зэрагъэунэфыгъэмкIэ, Ю. Р. Чэужъым страховой ахъщэ IэпыIэгъур къаIихыным фэшI Урысые Федерацием пенсиехэмкIэ ыкIи социальнэ страхованиемкIэ и Фонд Адыгэ РеспубликэмкIэ икъу­тамэ сэкъатныгъэ зэриIэмкIэ документ нэпцIхэр рихьылIэхи, хэбзэнчъэу сомэ мин 680-м ехъу къызIэкIигъэ­хьагъ.

ЩынэгъончъэнымкIэ Феде­ральнэ къулыкъум къыгъэхьазырыгъэ материалхэр IэубытыпIэ къызыфишIыхэзэ, АР-м хэгъэгу кIоцI IофхэмкIэ и Министерствэ иследственнэ гъэIорышIапIэ оперативнэ-лъы­хъон Iофтхьабзэхэр зэри­хьагъэх. Ащ икIэуххэм атетэу къэлэ гъэпсыкIэ зиIэ поселкэу Яблоновскэм щыщ хъу­лъфыгъэу илъэс 38-рэ зыныб­жьым бзэджэшIагъэ зэрэзэрихьагъэм фэшI Урысыем и Уголовнэ кодекс ия 159.2-рэ статья ия 3-рэ Iахь диштэу уголовнэ Iоф къыфызэIуа­хыгъ.

Мыекъопэ къэлэ хьыкумым Ю. Р. Чэужъым лажьэ иIэу ылъытагъ, Урысыем и Уголовнэ кодекс ия 159.2-рэ статья ия 3-рэ Iахь диштэу илъэси 2 хьапс тырилъхьагъ.

Ащ нэмыкIэу Адыгэ Рес­пуб­ликэм ипрокуратурэ ­идаоу Ю. Р. Чэужъым хэбзэнчъэу къызIэкIигъэхьэгъэгъэ ахъщэм къегъэгъэзэжьыгъэным фэгъэхьыгъэми къыдырагъэштагъ.

ЩынэгъончъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ ипресс-къулыкъу.