Мыекъопэ къэлэ IэзапIэм икъутамэу урамэу Чкаловым тетыр псауныгъэм икъэухъумэн къы­хиу­бытэрэ псэуалъэхэм ягъэкIэжьынкIэ прог­раммэм къызэрэдилъытэрэм тетэу агъэцэкIэжьыщт.

Адыгэ Республикэм псауныгъэм икъэухъумэнкIэ и Министерствэ къы­зэрэщатыгъэмкIэ, 2024-рэ илъэ­сым IофшIэнхэр зэшIуахынхэу ра­хъухьэгъагъ. Ау ипIалъэм къыпэу ахэр аублэнхэ алъэкIыгъ.

Шъугу къэтэгъэкIыжьы: мы аужырэ лъэхъаным республикэм псауныгъэм икъэухъумэн фытегъэпсы­хьэгъэ псэуалъэхэм ягъэкIэжьынкIэ Iофышхо щызэшIуахыгъ. Учреждениябэхэр агъэцэкIэжьыгъэх, кIэу сымэджэщхэр, IэзапIэхэр, фельдшер-мамыку пунктхэр, врач амбулаториехэр ашIыгъэх. Урысые Федерацием и Президентэу Вла­димир Путиным, УФ-м и Правительствэ, партиеу «Единэ Россием» яIэпыIэгъу хэлъэу а IофшIэныр лъагъэкIуатэ.

ГущыIэм пае, псэупIэу Камен­номостскэм IэзапIэр зычIэт унэр щагъэцэкIэжьыгъ, къалэу Мыекъуа­пэ кIэу щашIыгъ, Кощхьэблэ районым ит псэупIэу Дружбэмрэ Теуцожь районым икъуаджэу Джэ­джэхьаблэрэ врач амбулаториитIу ащатIупщыгъ. 2024-рэ илъэсым Га­вердовскэм фельдшер-мамыку IэзапIэу дэтыгъэр жъы зэрэхъугъэм къыхэкIэу врач амбулаториякIэ щагъэпсыщт, псэупIэу Инэм кIэлэцIыкIухэмрэ зыныбжь хэкIотагъэ­хэмрэ апае IэзэпIакIэ щашIы.