АР-м и Къэралыгъо Совет — Хасэм и Тхьаматэу Владимир Нарожнэмрэ ащ игуадзэу Цэй Эдуардрэ Парламентым икомитетхэм ащыщхэм япащэхэр ягъусэхэу блэкIыгъэ тхьамафэм Теуцожь районым щыIагъэх.

[caption id="attachment_135654" align="aligncenter" width="800"] АР-м и Къэралыгъо Совет — Хасэр.[/caption]

Поселкэу Лъэустэнхьаблэ ахэм яIофшIэн щырагъэжьагъ. «Къэлэ Iэрыфэгъу щыIакIэр гъэпсыгъэныр» зыфиIорэ программэм къыщыдэлъытагъэу ащ псэуалъэхэр щагъэцэкIэжьых, кIэу щашIых. ГущыIэм пае, поселкэм иурамэу Пшызэ Iушъо рекIокIырэм, ыцIэри Набережная, зыгъэпсэфыпIэ чIыпIэ ща­гъэпсы. Районым ыкIи псэупIэ коим япащэхэм къызэраIуа­гъэмкIэ, ащ ипроект загъэхьазырым цIыфхэм яшIоигъоны­гъэхэр къыдалъытагъэх.

КIэлэцIыкIухэм апае джэгупIэ, кушъхьэфачъэхэм апае гъогу­хэр ащ щашIых, тIысыпIэ чIыпIэхэр иIэщтых. Къэралыгъо Советым — Хасэм идепутатэу, псэуа­лъэр зышIырэ хъызмэтшIапэу «Ресурс» зыфиIорэм ипащэу КIыкI Аслъан къызэриIуагъэмкIэ, шап­хъэхэр хэзыгъэ имыIэу къыдэлъытэгъэнхэм ынаIэ тет, пIа­лъэхэм ашIомыкIхэу аухыщт.

Джащ фэдэу «ПсэупIэр ыкIи къэлэ щыIакIэр» зыфиIорэ ­лъэпкъ проектым къыщыдэлъытагъэу фэтэрыбэу зэхэт унэу урамэу Лениным ыцIэ зыхьырэм тетхэм ащыщхэм ящагу зэтыра­гъэпсыхьэ. Ащи Парламентым ипащэхэр щыIагъэх. Щагум лъэсрыкIо гъогухэр фашIыгъа­хэх, тIысыпIэхэр, остыгъэхэр, нэмыкIэу цIыфэу унэхэм ачIэс­хэм ящыкIэгъэщтхэр щагъэуцугъэх. Джыри автомашинэхэм апае уцупIэхэмрэ кIэлэцIыкIу джэгупIэхэмрэ щашIыщтых. Iоф­шIэнэу щагум щызэшIуахыщтхэм пстэумкIи сомэ миллиони 6,2-рэ апэIухьащт.

[caption id="attachment_135655" align="aligncenter" width="800"] АР-м и Къэралыгъо Совет — Хасэр.[/caption]

— Поселкэм дэсхэм Iэрыфэгъу щыIакIэ яIэным фытегъэ­псыхьагъэу IофшIэнышхо щашIэ, — къыIуагъ Владимир Нарожнэм. — Ау ащ къыщыуцунхэу щытэп, джыри зэшIохыгъэн фаер бэ. Анахь шъхьаIэхэм ащыщ федеральнэ программэу «Псы къабз» зыфиIорэм поселкэр хэлэжьэнышъ, псэу зэшъощтхэр къызэрэчIащыщт псэуалъэр щыгъэуцугъэныр.

Нэужым Владимир Нарожнэмрэ Цэй Эдуардрэ район пащэхэр ягъусэхэу лэжьыгъэр зыщыIуахыжьырэ хъызмэтшIапIэхэм ащыщхэр къакIухьагъэх. Мы муниципальнэ образова­нием ичIыгулэжьхэм зэкIэмкIи бжы­хьэсэ хьэ гектар 1248-рэ апхъы­гъагъ, ар Iуахыжьыгъах. Парламентым итхьаматэхэр къызэрэщагъэгъозагъэхэмкIэ, ащ изы гектар, гурытымкIэ лъытагъэу, центнер 37,1-рэ къырахыгъ, тонн 4634-рэ къаугъоижьыгъ.

Коцым гектар 11356-рэ рагъэубытыгъагъ. Ар мы мафэхэм етIупщыгъэу Iуахыжьы, зым гу­рытымкIэ центнер 35,5-рэ къырахы. Гъатхэу кIуагъэр зэ­рэчъыIагъэм, оялэу зэрэщытыгъэм яягъэ къэкIуагъ.

[caption id="attachment_135656" align="aligncenter" width="800"] АР-м и Къэралыгъо Совет — Хасэр.[/caption]

Теуцожь районым цумпэ къэгъэкIыным зыщеушъомбгъу, чъыгхатэу щагъэтIысхьагъэхэм щахагъахъо. Ащ фэшI чъыгхатэхэм апылъ хъызмэтшIапIэу «МыIэрыс» зыфиIорэм ипащэу ЛIыIэпIэ Ибрахьимэрэ цумпэ зэфэшъхьафхэр, дэжъыехэр къызщагъэкIыхэрэу «Сады ­Адыгеи» зыфиIорэм игъэцэкIэкIо пащэу Людмила Цулаевамрэ ахэр аIукIэгъагъэх.

МыIэрысэ ыкIи къужъ лъэпкъ зэфэшъхьафхэр, черешнер, дэ­жъыехэр зыхэт чъыгхатэхэр, голубикэ, ежевикэ, нэмыкI цум­пэхэр зытет хьасэхэр, питомникэу гъэтIысыжьхэр къызщагъэкIыхэрэр зэрагъэлъэгъугъэх. Ахэм гектар 500-м ехъу мы хъызмэтшIэпIитIум арагъэубытыгъ. Уахътэм къыздихьыгъэ шIыкIэхэр агъэфедэхэзэ ахэм яшIушIэх, псы акIагъахъо, уц шIойхэм, хьэцIэ-пIацIэхэм ащау­хъумэх.

ХЪУТ Нэфсэт.