«ЛъэхъаныкIэм диштэщт гухэлъышхохэр» зыфиIорэ фо­румэу Москва щыкIуагъэм Мыекъопэ къэралыгъо технологическэ университетым прикладной информатикэмкIэ икафедрэ ипащэу Цундышк Вячеслав ипроект анахь дэгъухэм щахалъытагъ.

[caption id="attachment_135608" align="aligncenter" width="446"] МКъТУ.[/caption]

Апэрэ мафэм авторхэм инвестор­хэмрэ гъусэныгъэ зыдыряIэн алъэкIыщтхэмрэ япроектхэм нэIуасэ афашIы­гъэх. Цундышк Вячеслав ипроектэу «Информационно-аналитическая система анализа образовательного трека обуча­ющегося на основе искусственного интеллекта» зыфиIорэм экспертхэм осэшхо къыфашIыгъ ыкIи лъэныкъоу «Цифровые сервисы» зыфиIорэмкIэ Урысыем ипроект 1000 анахь дэгъухэм ахалъытагъ. Проект 3000-м ехъу мы лъэныкъом къырахьылIэгъагъ, форумым хэлэжьэнхэу къыхахыгъэр 75-рэ.

Форумыр заух нэуж Цундышк Вячеслав Владимир Путиныр зыхэлэжьэгъэ пленарнэ зэхэсыгъом къырагъэблэгъагъ. Ащ ипроект джыри Iоф дашIэщт, бэдзэ­огъум ыкIэхэм адэжь «Архипелаг 2023» зыфиIорэ форумэу Новосибирскэ щыкIощтым рахьылIэщт.

Зэнэкъокъоу «ЛъэхъаныкIэм диштэщт гухэлъышхохэр» зыфиIорэм проект мин 24-м ехъу рахьылIэгъагъ. Джащ фэдэу ныбжьыкIэ стартапхэм гъомылэпхъэшI индустрием зыщягъэушъомбгъугъэнымкIэ и Акселерационнэ программэу «ФудСовет» зыфиIоу, тактильнэ тхылъэу «ЗыгорэкIэ машIом зыкъыштэмэ» зышъхьэм ипроектэу МКъТУ-м къыгъэхьазыры­гъэхэми цIыфхэр нэIуасэ афашIыгъэх.

Зигугъу къэтшIыгъэ форумыр зыфытегъэпсыхьагъэр цIыф чанхэр зэкъоуцогъэнхэр, Урысыем изыкIыныгъэ игъэ­пытэн телъытэгъэ проектхэр къыхэгъэщыгъэнхэр ыкIи ахэм IэпыIэгъу ягъэ­гъотыгъэныр ары. Илъэси 3-м къыкIоцI идея.росконгресс.рф зыфиIорэ платформэм нэбгырэ мин 400 фэдизмэ защарагъэтхыгъ. Форумым изэхэщакIо стратегическэ инициативэхэмкIэ Агентствэр, Росконгрессым и Фонд, Урысые Федерацием и ВЭБ.