Федеральнэ къэралыгъо бюджет учреждениеу «Темыр-Кавказ УГМС-м» къызэритыгъэмкIэ, 2023-рэ илъэсым бэдзэогъум и 7-мрэ и 8-мрэ машIом къалэу Мыекъуапэ, Мые­къопэ районым икъушъхьэлъэ чIыпIэхэм, Адыгэ­къалэ, Теуцожь, Тэхъутэмыкъое, Шэуджэн, Красногвардейскэ, Джэджэ, Кощхьэблэ районхэм за­къыщиштэн ылъэкIыщт.

Зигугъу къэтшIыгъэ чIы­пIэхэм, хыкъумхэм (къа­мыл зэхэкIыхьагъэхэм), экономикэм ипсэуалъэ­хэм, тхьамыкIагъо къызыщыхъун ылъэкIыщт чIыпIэ­хэм апэблэгъэ псэу­пIэхэм машIо къакIэнэным ищынагъо а мафэхэм щыIэщт.

Метеокъулыкъум муниципальнэ образованиехэм ядежурнэ-диспетчер къулыкъухэмрэ яорганизацие­хэмрэ игъо афелъэгъу ренэу зэпхыныгъэ зэдыряIэнэу, гумэкIыгъо къэ­хъун зэрилъэкIыщтым фэ­хьа­зырынхэу. Адыгэ Республикэм зыкъэухъумэ­жьынымкIэ ыкIи ошIэ-дэмышIэ IофхэмкIэ и Комитет машIом зыкъыштэн зэрилъэкIыщтымкIэ цIыф­хэм макъэ аригъэIун фае.

ЧIыопс нэшанэ зиIэ гумэкIыгъо къэтэджын зи­лъэкIыщт лъэхъаным лъэ­шэу зыщысэкъынхэ фэе шапхъэм техьанхэу, къэ­хъун ылъэкIыщт авариехэм ядэгъэзыжьын фэ­гъэзэ­гъэщт бригадэхэм чэщи мафи Iоф ашIэнэу игъо афелъэгъу. ЧIыпIэ зыгъэ­IорышIэжьынымкIэ къулыкъухэм япащэхэм администрацием иIофы­шIэхэр ягъусэхэу псэупIэ­коммунальнэ хъызмэтым ипсэо­лъэ шъхьаIэхэм Iоф зэрашIэрэм чэщи мафи гъунэ лъафын фае.

ОшIэ-дэмышIэ тхьамыкIагъо Адыгэ Республикэм къыщыхъун зэрилъэкIыщтымкIэ муниципальнэ образованиехэм, къоджэ псэупIэхэм япащэхэм, зыкъэухъумэжьынымкIэ ыкIи ошIэ-дэмышIэ Iоф­хэмкIэ отделхэм яIофы­шIэхэм, предприятиехэм, организациехэм, аварийнэ-къэгъэнэжьэкIо къулыкъухэм, учреждениехэм япащэхэм макъэ ягъэIугъэнэу ащ игъо елъэгъу.