Мыекъуапэ щыщ Владимир Б. еупчIыгъэх хэушъхьафы­кIыгъэ дзэ операцием кIонэу зэрэхъугъэмкIэ. Ащ иджэуапыгъ: «СиIофшIэнэу зэрэщытым пае сыкIуагъ».

[caption id="attachment_135544" align="aligncenter" width="800"] А. Гусев.[/caption]

1993-рэ илъэсым Владимир къэхъугъ, республикэм икъэлэ шъхьаIэ еджапIэр къыщиухыгъ, нэужым пщэрыхьэкIо-IэшIу-IушIушI сэнэхьатыр Мыекъопэ къэралыгъо гуманитар-техническэ колледжым щызэригъэгъотыгъ, шIокI зимыIэ дзэ къулыкъоу ЦIэмэз дэт ошъогу-десант дзэхэм ащихьыгъэм ыуж теубытагъэ ышIыгъ зэзэгъыныгъэ шIы­кIэкIэ къулыкъум лъыпидзэ­жьынэу.

Украинэм хэушъхьафыкIыгъэ дзэ операциер зыщырагъажьэм, кIалэм къыгурыIуагъ хъурэ-шIэрэм пэIапчъэу щытын зэримылъэкIыщтыр, къэралыгъом игъунапкъэхэр, Донецкэ ыкIи Луганскэ хэкухэм ащыпсэухэрэр къэзыгъэгъунэхэрэм акIыгъун зэрэфаер ыкIи ащ кIонэу ежь ишIоигъоныгъэкIэ заригъэтхыгъ.

Хэгъэгу зэошхом илъэхъан нацизмэм текIогъэ лIыхъужъхэм яIофышIу дзэкъулыкъушIэм лъегъэкIуатэ. Владимир къыкIегъэт­хъы джы къежьэгъэ фашизмэм ебэныгъэныр ежь зэрипшъэры­лъыр, ар дэгъоу къыгурэIо ыкIи зэхешIэ.

Щынэ зымышIэрэ кIалэм хэу­шъхьафыкIыгъэ дзэ операцием зыкъыщигъэлъэгъонэу игъо ­ифагъ — пыим ипулемет къыздиукIырэ чIыпIэм гранатэр тыридзи, икуп икомандирэу пыищэхэм ямашIо хэфагъэр щынэгъо чIыпIэм рищыжьыгъ. Дзэ операцием Владимир мэзитIурэ щыIагъэу ыбгъэ къызэрауIагъэм дзэ къулыкъу хьыныр зэпигъэугъ. ЛIыгъэу къы­хэфагъэм пае медалэу «За отвагу» зыфиIорэр ащ къыфа­гъэшъошагъ, икIыгъэ илъэсым ишышъхьэIу мазэ тыныр Мые­къуапэ ипащэу Геннадий Мит­рофановым IэкIигъэхьажьыгъ. Джащыгъум Владимир къыIотэгъагъ унагъом зэрэщапIугъэмрэ ыныбжь илъэс 13 зыхъугъэм къыщыублагъэу ныбжьыкIэ дзэ­патриотическэ объединениеу «Единство» зыфиIоу Джарымэ Рэщыдэ зипащэм зэрэхэтыгъэм­рэ яшIуагъэ къызэрэкIуагъэр.

— Шэпхъэ лъагэхэм адиштэрэ дзэхэм къулыкъу ащыпхьынымкIэ ищыкIэгъэ ухьазырыныгъэ тиIэным пае шIэныгъэхэр зэдгъэ­гъотыщтыгъэх, ащ лъэшэу ишIуа­гъэ къысэкIыжьыгъ дзэ къулыкъу схьы зэхъуми, хэушъхьафыкIыгъэ дзэ операцием сызыщэIэми. АщкIэ лъэшэу сыфэраз Рэщыдэ, — къытфиIотагъ Владимир.

Дзэ операцием зыщыIэгъэ мэзитIум пчъагъэрэ къафакIощтыгъэ Мыекъуапэ, Адыгеим, Урысыем инэмыкI шъолъырхэм къащаугъоищтыгъэ шIушIэ Iэпы­Iэгъур.

— Ар къызытIукIэкIэ, тыгу ихъыкIыщтыгъэр къэIотэгъуай, — еIо кIалэм. — Лъэшэу тыгу­шIощтыгъ. Сабыйхэм къытфатхыхэрэм татеIабэщтыгъ. Уигуапэ мэхъу къэралыгъошхом щы­псэурэр зэкIэ къызэрэпкъотыр зэхапшIэ зыхъукIэ.

ДзэкъулыкъушIэхэр джащ фэ­дэу шъхьафит ашIыжьыгъэ чIы­налъэхэм ащыпсэухэрэм адэIэпыIэщтыгъэх. Владимир къыIотагъ Донбасс щыпсэухэрэр пчъагъэрэ къазэрафакIощты­гъэхэр IэпыIэгъу лъыхъухэу — медицинэ пкъыгъохэм, шхынхэм афаехэу… Ахэр IэнэкIэу Iуагъэ­кIыжьыщтыгъэхэп, алъэкIыщтымкIэ адеIэщтыгъэх.

Ядзэ пшъэрылъхэр зыгъэцэ­кIэрэ къулыкъушIэхэм лIыгъэ­шхо зэрахьэ. ХэушъхьафыкIыгъэ дзэ операцием хэлажьэхэрэм псын­кIэу ядэжь къагъэзэжьынэу Вла­димир афэлъэIуагъ.

— ДзэкIолIхэм кIуачIэрэ щэIагъэрэ яIэнэу сафэлъаIо, псынкIэу къагъэзэжьынэу афэсэIо. ТекIоныгъэр тэры зиещтыр! — къы­Iуагъ ащ.

А. Балабась.