Урысыем хэгъэгу кIоцI IофхэмкIэ и Министерствэ IэкIэлъ къэбархэр ахъщэкIэ къаIызыхыгъэ унэе детективым уголовнэ Iофэу къыфызэIуахыгъэмкIэ хьыкумым ыштэгъэ унашъом кIуачIэ иIэ хъугъэ.

ЩынэгъончъэнымкIэ Федеральнэ къулы­къум Адыгэ РеспубликэмкIэ и ГъэIорышIапIэрэ республикэ полицием щынэгъончъэнымкIэ иотделрэ яIофы­шIэхэм зэрагъэунэфыгъэмкIэ, Мыекъуа­пэ щыщ А. М. Дымовым унэе детективым ифэIо-фашIэхэр зэригъэцакIэрэмкIэ Интернетым мэкъэгъэIу ригъэхьэгъагъ. Урысыем хэгъэгу кIоцI IофхэмкIэ и Министерствэ IэкIэлъ къэбархэм ащыщ къызIэкIэзыгъахьэ зышIоигъогъэ хъулъфыгъэ горэм 2023-рэ илъэсым имэзае ащ зыкъыфигъэзагъ. Хабзэм къыгъэгъу­нэрэ къэбар шъэфыр къыIихынэу А. М. Дымовым полицием иIофышIэу инэIуасэм зыфигъэзагъ.

Урысыем хэгъэгу кIоцI IофхэмкIэ и Министерствэ къалэу МыекъуапэкIэ иотдел полициемкIэ иучастковэ уполномоченнэ хабзэм къыгъэгъунэрэ къэбар шъэфхэм копиехэр атырихи, мессенджеркIэ А. М. Дымовым хэбзэнчъэу ахэр фигъэхьыгъэх. Полицием иIофышIэ къыIэкIэкIыгъэ къэбархэр А. М. Дымовым зыкъыфэзыгъэзэгъэгъэ хъулъфыгъэм мессенджеркIэ IэкIигъэхьагъэх.

Урысыем и Следственнэ комитет Адыгэ РеспубликэмкIэ иследственнэ гъэIорышIапIэ оперативнэ-лъыхъон Iоф­тхьабзэу зэрихьагъэхэмкIэ материалхэр щынэгъончъэнымкIэ федеральнэ къулыкъухэм IэубытыпIэ къызыфашIыхэзэ, Урысыем и Уголовнэ кодекс ия 272-рэ статья ия 2-рэ Iахь диштэу илъэс 31-рэ зыныбжь А.М. Дымовым уголовнэ Iоф къыфызэIуахыгъ. Урысые Федерацием и Уголовнэ кодекс ия 286-рэ статья ия 3-рэ Iахь ипунктэу «е»-м диштэу полици­ем иIофышIи уголовнэ Iоф къыфаIэтыгъ.

Мыекъопэ къэлэ хьыкумым А. М. Дымовым лажьэ иIэу ылъытагъ, Урысыем и Уголовнэ кодекс ия 272-рэ статья ия 2-рэ Iахь диштэу сомэ 100000 тазырэу тыралъхьагъ. Хьыкумым иунашъо кIуачIэ иIэ хъугъэ.

Полицейскэм къыфаIэтыгъэ уголовнэ Iофым изэхэфын джыри макIо.

ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу