Нарт эпосым фэгъэхьыгъэ мультфильмыр
Нарт эпосым фэгъэхьыгъэ мультфильмыр дунэе кинофестивалэу 2023-рэ илъэсым Уругвай щыкIощтым къыщагъэлъэгъощт.
Ар зэхэзыгъэуцуагъэр Инэм къыщыхъугъэ Лаикъо Бэл.
«Адыгей гупсэм сэ сыщыпсэурэп, лъэшэу ащ сыпэIудзыгъ. Мультфильмым изэхэгъэуцон сэркIэ мэхьанэшхо иI. Адыгэхэм якультурэрэ яшэн-хабзэхэмрэ ащ къыщызгъэлъагъохэ сшIоигъуагъ. ЦIыфхэм сиIофшIагъэ осэ дэгъу къыфашIынэу, ащ ыгъэрэзэнхэу сэгугъэ», — къыIуагъ фильмыр зэхэзыгъэуцуагъэу Лаикъо Бэлэ.
Тэхъутэмыкъое районым иадминистрацие къызэрэщаIуагъэмкIэ, Лаикъо Бэлэ зэхигъэуцогъэ мультфильмэу 2023-рэ илъэсым Уругвай щыкIощт дунэе кинофестивалым къыщагъэлъэгъощтыр адыгэхэм янарт эпос къытегущыIэ. Пшъэшъэжъыер ыпэрапшIэу зыфэягъэр ицIыкIугъом инанэ къыфиIотэгъэгъэ тхыдэжъхэм атехыгъэу фильм зэхигъэуцонэу арыгъэ, ау нэужым нарт эпосым зеджэм, а тхылъым техыгъэу мультфильм зэхигъэуцонэу рихъухьагъ.
«Урымхэмрэ скандинавхэмрэ яэпосхэр зэрэзэлъашIэрэр, тиадыгэ эпос тиныбжьыкIэхэм зэрамышIэрэр лъэшэу сыгу хэкIы, — къыIуагъ Лаикъо Бэлэ. — Тхыдэжъхэм афэгъэхьыгъэ фильмхэр зызэхагъэуцохэкIэ адыгэхэм якультурэрэ ятарихърэ нахь зэрэзэлъашIэщтым сицыхьэ телъ».