2023-рэ илъэсыр къызихьагъэм къыщыублагъэу жъоныгъокIэ мазэм ыкIэм нэс пштэмэ, Адыгеим щыпсэухэрэм Урысыем инэмыкI шъолъыр 47-мэ мызекIорэ мылъкум хэхьэрэ псэуалъэ ащащэфыгъэу Роскадастрэм щарагъэтхыгъ.

Ахэм япроцент 82-р Краснодар краир ары зэрытыр, ау ащ имызакъоу, Ставрополь краим, Къэрэщэе–Щэрджэс Республикэм, ары пакIошъ, чыжьэу пэIудзыгъэхэ Сахалинскэ хэкум, Ханты–Мансийскэ автономнэ шъолъырым, нэмыкIхэм къащащэфыгъэх.

Уахътэу зигугъу къэтшIыгъэр пштэмэ, зы шъолъырым ущыпсэоу, нэмыкIым мызекIорэ мылъкур зэрэщыбгъэпсыщт шIыкIэр (экстерриториальный принцип) Адыгеим щыщэу зыгъэфедагъэр нэбгырэ минрэ 300-рэ мэхъу.

— Республикэм уимыкIэу нэмыкI шъолъыр щыIэм мызекIорэ мылъкум епхыгъэ зэзэгъыныгъэр дэпшIыныр ары ащ къикIырэр. ГущыIэм пае, Мыекъуапэ удэмыкIэу Санкт-Петербург, Челябинскэ е нэмыкI къалэ дэт унэ къэпщэфын е пщэжьын, шIухьафтынэу къыуатыгъэмэ е зиер щымыIэжьэу, къыпфигъэнагъэмэ, тхылъхэр бгъэпсынхэ плъэкIыщт, — къыIуагъ Роскадастрэм АР-мкIэ и ГъэIорышIапIэ ипащэу ХъокIо Аюб.

НэмыкI шъолъыр щыпсэоу, ау мы илъэсым Адыгеим ит псэуалъэ ыщэфыгъэу тхылъхэр ыгъэпсынхэу къэзытыгъэхэр нэбгырэ мини 6-м ехъу. Ахэм янахьыбэр Краснодар краим щыщых.

МызекIорэ мылъкоу нэмыкI шъолъыр щыIэр зыгъэпсы зышIоигъохэм лъэIу тхылъхэр МФЦ-м щатынхэ алъэкIыщт, Росреестрэм иинтернет нэкIубгъо агъэ­федэми хъущт, Роскадастрэм иIофышIэ ядэжь къырагъэблэгъэнэуи амал яI. Ащ шапхъэу пылъхэр мы телефонымкIэ зэрагъэшIэнхэ алъэкIыщт: 8 (8772) 59-30-46 (ащ тебгъэхъощтыр 2227)

— «Экстерриториальнэ» шIыкIэм тетэу тхылъхэр бгъэпсынхэм уахътэу ыкIи мылъкоу цIыфым ащ тыригъэкIодэщтыр нахь макIэ ешIы, къэралыгъо фэIо-фашIэхэр нахь къызIэкIэгъэхьэгъошIу мэхъух, — къыхигъэщыгъ Росреестрэм АР-мкIэ и ГъэIорышIапIэ ипащэу Марина Никифоровам.