ПсэолъэшIыным къыпыкIыгъэ пыдзафэхэр Iуамыщхэу хэкIыр зыдахьырэ чIыпIэхэм къызэрэIунэхэрэм ыгъэгумэкIыхэу фэтэрыбэу зэхэт унэхэм ачIэсхэр къыкIэупчIэх. Ащ джэуап къетэтыжьы.

ПсэолъэшIыным къыпыкIырэ хэкIымрэ коммунальнэ пыдзэфэ пытэхэмрэ зэтекIых. Пыдзэфэ пытэхэм ахэхьэх хэкIэу унэгъо IофшIэнхэм къапыкIыхэрэр, жъы хъугъэ псэуалъэу, гущыIэм пае, пхъэн­тIэкIу, диван, пIэкIор зыфэпIощтхэр, унэгъо техникэр. Ахэр контейнерхэм аралъхьанхэу е ахэм адэжь къагъэтIы­лъынхэу шапхъэхэм фитыныгъэ къаты.

ПсэолъэшIыным къыпыкIыгъэ пыдза­фэхэм ахэхьэх, гущыIэм пае, бетоныр, шъхьаныгъупчъэ рамэу къыхахыжьыгъэ­хэр, апчхэр, псэолъэшIыным щагъэфедагъэхэр зыкIоцIыщыхьэгъагъэхэр е зэрылъыгъэхэр, унэр зэхахыжьыгъэмэ, ащ гъучIым, пхъэм ахэшIыкIыгъэу къы­хэкIыгъэхэр, унашъхьэм къытекIыгъэхэр, нэмыкIхэр. Мыхэр хэкIыр зэратэкъорэ контейнерхэм аралъхьэхэ хъущтэп, ыпашъхьэ щызэтыралъхьанхэуи хэбзэгъэ­уцугъэм къыдилъытэрэп. Ахэм ядэщын шъолъыр операторым ипшъэрылъхэм ахахьэрэп. Арышъ, псэолъэшIыным къы­пыкIыгъэ пыдзафэхэр бакхэм адэжь загъэтIылъхэкIэ, хэкIыр щызэтехьагъэ мэхъу.

Ащ фэдэ пыдзафэхэм ядэщынкIэ хэкIыпIитIу щыI. ЗымкIэ гъэIорышIэкIо компаниеу унэр зэпхыгъэм иIэпыIэгъукIэ Iупщын плъэкIыщт. Фэтэрыбэу зэхэт унакIэхэм ягъэIорышIакIохэм хэкIыр дэзыщырэ компаниехэм зэзэгъыныгъэ адашIэу, псэолъэшIыным къыпыкIыгъэ пыдзафэхэм апае бакхэр къарагъэгъэуцухэу бэрэ къыхэкIы. Ащ ыпкIэ цIыфхэм аты, тефагъэр квитанцием къыратхэ.

ЯтIонэрэ хэкIыпIэр хэкIым идэщын фэгъэзэгъэ хъызмэтшIапIэм ор-орэу зэзэгъыныгъэ дэпшIыныр ары. «ЭкоЦентрэм» ащ фэдэ фэIо-фашIэхэр егъэцакIэх. Ащ пае телефонхэр къэтэгъэна­фэх: 8-918-425-96-22 (Мыекъуапэ), 8-962-868-12-29 (Яблоновскэр). Джащ фэдэу интернет нэкIубгъор агъэфедэн алъэкIыщт. Мары адресыр: htts://adygeya.clean-rf.ru.