1995-рэ илъэсым къыщегъэжьагъэу гъэмэфэ хьисап еджапIэр республикэм щызэхащэ. Хабзэ зэрэхъугъэу, Адыгэ къэралыгъо университетым епхыгъэ зыгъэпсэфыпIэу «Горная легенда» зыцIэм ар щэкIо. [caption id="attachment_135359" align="aligncenter" width="800"] АКъУ.[/caption]

«Сэнаущыгъэ зыхэлъ кIэлэцIыкIухэр» зыфиIорэ шъолъыр программэм къыды­хэлъытагъэу ар зэхащэ. АР-м гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетыр, мы апшъэрэ еджапIэм епхыгъэ Кавказ хьисап гупчэр, Республикэ естественнэ-хьисап еджапIэр ыкIи гъэсэныгъэ гупчэу «Полярис-Адыгея» зыфиIохэрэр ары мы илъэсым ащ кIэщакIо фэхъугъэхэр.

Хабзэ зэрэхъугъэу, я 7 — 11-рэ классхэм ащеджэрэ кIэлэеджэкIуи 120-рэ мыщ къекIолIагъэх. Ахэр Адыгеим, Къал­мыкъым, Московскэ, Пензенскэ, Волгоградскэ, Астраханскэ, Ростовскэ, Краснодар ыкIи Ставрополь крайхэм ыкIи Москва къарыкIыгъэх.

НыбжьыкIэхэм хэушъхьафыкIыгъэ программэмкIэ Iоф адашIэ. Апэрэ тхьамэфитIум олимпиадэ хьисапымкIэ кIэлэеджа­кIохэм Iоф адашIэщт, шъхьадж ыныбжь ыкIи шIэныгъэу иIэм ялъытыгъэу программэхэр къафыхахыщтых. КIэлэеджа­кIохэр зэреджэхэрэм дакIоу зэнэкъокъу зэфэшъхьафхэр афызэхащэх. Мафэ къэс гъэмэфэ хьисап еджапIэм щыIэхэм къа­гъэлъэгъорэ шIэныгъэхэр дунэе хъытыум къырагъахьэх.

Ящэнэрэ тхьамафэм хьисапымкIэ ыкIи ащ хэхьэрэ приложениехэмкIэ хэушъхьэфыкIыгъэ курсхэр афызэхащэщтых. Нэбгырэ пэпчъ зыфэе курсыр къыхихын амал иI, ахэр сыхьатих зырыз е зы курс инэу сыхьат 12 хъурэр къы­хахын фае. Пчэдыжьым къыщегъэжьагъэу щэджагъом нэс теоретическэ Iоф­шIэнхэм, щэджэгъо ужым практическэ ыкIи егъэджэн-ушэтын IофшIэнхэм ягъэцэкIэн ыуж ехьэх. ХэушъхьафыкIыгъэ курсхэм ауж конференцие зэхащэ, анахь IофшIэн дэгъухэр пленарнэ доклад ашIых.

Хьисапым изэгъэшIэн дакIоу мы еджапIэм щыIэ кIэлэеджакIохэм лъэныкъо зэфэшъхьафхэмкIэ шIэныгъэхэр арагъэгъоты. Илъэс къэс зэхащэхэрэм ащыщ арт-фестивалэу «Море картона» зыфиIорэр. Ар гъэшIэгъонэу макIо, джащ фэдэу интеллектуальнэ ыкIи квест джэгукIэхэр, адыгэ культурэм и Мафэ фэгъэхьыгъэ Iофтхьабзэхэр, спортивнэ зэнэкъокъухэр ыкIи нэмыкIхэр зэхащэщтых. Джащ фэдэу цIыф гъэшIэгъонхэм аIуагъэкIэщтых, акварелькIэ сурэтхэр ашIыщтых, адыгэ къуаем ыкIи нэмыкI лъэпкъ шхынхэм афэгъэхьыгъэ мастер-классхэр, зекIонхэр афызэхащэщтых.

Адыгэ къэралыгъо университетым ипресс-къулыкъу.