Адыгэ къэралыгъо университетым икIэлэегъаджэу, юридическэ шIэныгъэхэмкIэ кандидатэу Шъаукъо Ибрахьим авторскэ купым хэтэу студентхэр зэрэрагъэджэхэрэ тхылъэу «Хэгъэгум итарихъ ыкIи ифитыныгъэхэр» зыфиIорэм изэхэгъэуцон Iоф дишIагъ.

А тхылъымкIэ юриспруденцием фэгъэзагъэхэр ары рагъэджэщтхэр.

Хэгъэхъуагъэхэр иIэхэу ыкIи икIэ­­рыкIэу дэлэжьэ­жьыгъэхэу тхы­лъыр ящэнэрэу къыда­гъэкIыжьы.

Я 7-рэ ыкIи я 8-рэ едзыгъохэм язэхэгъэуцон ары Шъаукъо Ибра­хьимэ зыхэтыгъэ командэр зыдэлэжьагъэр, ахэр зыфэгъэхьы­гъа­гъэхэр: «Уры­сыем икъэралыгъо гъэпсыкIэ ыкIи ифитыныгъэхэр я 19-рэ лIэшIэгъум иапэрэ кIэлъэ­ныкъо зыфэдагъэхэр», «Урысыем икъэралыгъо гъэпсыкIэ ыкIи ифитыныгъэхэр реформэхэм ыкIи контрреформэхэм ялъэ­хъан, я 19-рэ лIэшIэгъур».

— Уахътэр макIо, тхылъ­хэм Iоф адэшIэ­жьыгъэн фае мэхъу. Ар гурыIогъуаеп, сыда пIомэ хъарзынэщ документыкIэ­хэр къагъотыжьых, ушэ­тыныкIэхэр ашIых, ахэр зэкIэ къыдэмылъы­тэ­жьыхэ хъущтэп, — къы­Iотагъ Шъаукъо Ибрахьимэ.

Хэбзэ актхэм ыкIи хэ­бзэ материалхэм язэ­фэхьысыжьхэр тхы­лъым къыщытыгъэх. Лъэхъэнэ зэ­фэшъхьафхэм къахэкIыгъэ нормативнэ документхэм язэгъэшIэн ары нахь къыщыхагъэщырэр. Ащ ишIуагъэкIэ рагъаджэ­хэ­рэм тарихъ хъугъэ-шIа­гъэхэр зэхашIэн, ахэр къызхэкIыгъэхэр зэрагъэшIэн ыкIи агу къырагъэ­нэжьын алъэкIы.

Апшъэрэ еджапIэм щырагъэ­джэрэ студентхэу юриспруденцием фэгъэ­загъэхэм егъэджэн тхы­лъыр афытегъэпсыхьагъ. Ар ­аштагъ Дунэе егъэ­джэн-методическэ гупчэу «Профессиональный учебник» зыфиIорэм, гъэсэ­ныгъэмрэ шIэныгъэмрэ я шIэныгъэ-ушэтыпIэ институт ыкIи хьыкум экспертизэмрэ уплъэкIунхэмрэ я Дунэе шIэныгъэ­ушэтэкIо гупчэ.