Илъэс къэс зэхащэрэ шъолъыр зэнэкъокъоу «Щынэгъончъэным иеджапI» зыфиIорэр мы мафэхэм Адыгеим щыкIуагъ. Къыблэ фе­де­ральнэ шъолъырым исубъекти 8-мэ къарыкIыгъэ нэбгыри 136-рэ Iофтхьабзэм хэлэжьагъ.

[caption id="attachment_135336" align="aligncenter" width="800"] МЧС.[/caption]

Командэ 16 хъухэу лъы­хъон-къэгъэнэжьын IофшIэнхэмкIэ кIэлэцIыкIухэр зэнэкъокъугъэх. КъэгъэнэжьакIохэм псым щагъэ­федэрэ пкъыгъохэр кIэлэцIыкIухэм къызфагъэфедэхэзэ IэпэIэсэныгъэу аIэкIэлъыр, джащ фэдэу апэрэ медицинэ IэпыIэгъур зищыкIагъэм рагъэкIын зэралъэкIыщтыр къагъэлъэгъуа­гъэх. Ащ нэмыкIэу ошIэ-дэмышIагъэ зыхэлъ тхьамыкIагъо къэхъумэ, анахьэу машIом зыкъыштэмэ, зэрэзекIонхэ фаемкIэ зэнэкъокъугъэх.

Зэфэхьысыжьхэр зашIыхэм апшъэрэ купым хэтхэмкIэ апэрэ чIыпIэр Адыгэ Республикэм ико­мандэ къыдихыгъ, ятIонэрэр — Севастополь, ящэнэрэ чIыпIэр Ростов хэкум якомандэхэм афагъэшъошагъэх. НахьыкIэхэр зыхэтхэ купымкIэ апэрэ чIыпIэр Севастополь икомандэ къыди­хыгъ. ЯтIонэрэ ыкIи ящэнэрэ чIыпIэхэр Республикэу Къырымрэ Адыгеимрэ якомандэхэм афагъэшъошагъэх.

[caption id="attachment_135337" align="aligncenter" width="800"] МЧС.[/caption]

Зэнэкъокъум икIэуххэр зыщызэфахьысыжьыгъэхэ Iофтхьабзэм хэлэжьагъэх АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет — Хасэм и Тхьаматэ игуадзэу Цэй Эдуард, Урысыем ошIэ-дэмышIэ IофхэмкIэ и Министерствэ и ГъэIорышIапIэу Адыгеим щыIэм ипащэу Станислав Илющенкэр, ГъэIорышIапIэм дэжь щызэхащэгъэ Общественнэ советым хэтхэр. Зэнэкъокъум текIоныгъэ къыщыдэзыхыгъэхэм афэгушIуа­гъэх ыкIи нэпэеплъ шIухьафтынхэр аратыжьыгъэх.

Адыгеим итворческэ коллективхэм къатыгъэ концертым Iофтхьабзэр къыгъэбаигъ.

КIАРЭ Фатим.