КIэлэеджакIохэм апае ыпкIэ зыхэмылъ зекIоу афызэхащагъэр графикым ыпэ итхэу аухы.

Я 5 — 9-рэ классхэм ащеджэхэрэм аратыгъэ социальнэ сертификатхэмкIэ а фэIо-фашIэр афагъэцэкIагъ. НыбжьыкIэхэм чэщ-зымафэм Мыекъопэ районым зыщагъэпсэфын амал яIагъ. Нахьыжъхэр ягъусэхэу пэшIорыгъэшъэу агъэнэфэгъэ чIыпIэм ращэлIагъэх. Джащ фэдэу кIэлэеджакIохэм шъолъырым икъэбар, итарихъ зыщызэрагъэшIэгъэ зекIохэр ыкIи мастер-классхэр афызэхащагъэх.

Шъугу къэдгъэкIыжьын, гъэрекIо къыщегъэжьагъэу я 5 — 9-рэ классхэм ащеджэхэрэм ыпкIэ хэмылъэу сертификатхэр аратэу аублагъ. Республикэм ис кIэлэцIыкIу 1316-мэ а фэIо-фашIэр къызфагъэфедагъ. Мы илъэсми ащ фэдизмэ ар агъэфедэнэу агъэнафэ. Ахэр кIэлэцIыкIухэу щытхъу тхылъ зэфэшъхьафхэр зиIэхэр, мобилизацием къыхиубытагъэхэм ясабыйхэр, кIэлэцIыкIубэ зэрыс ыкIи гъот макIэ зиIэ унагъохэм къарыкIыгъэхэр ары ыпэрапшIэу сертификатхэр зыфагъэшъуашэхэрэр. Лъэпкъ проектэу «Туризм и индустрия гостеприимства» зыфиIорэм къыдыхэлъытагъэу ар зэхащагъ.