Ащи уахътэ ищыкIагъ

ЛIым хьажъущыр дэхэцIыкIу къыхьыгъ. Унэм исыр зэкIэ ащ дэджэгухэ ашIоигъоу къызыпэбанэхэм ариIуагъ:

— Шъудэджэгузэ делэ шъумышIы. Мыр хьэ ябгэ хъун фай, зэкIэри щыщынэхэу. Армырмэ, чылэ гъунэ дэдэм тыщыс, былым хъущи, тхьачэт-чэт бэкIайи тищагу дэт, щынагъо горэ ащ дэлъын фае.

«ДэгъукIэ» зэдаштагъэ, ежь лIыми шъузым фигъэ­пытагъ хьэм егугъунэу, игъом тэрэзэу ыгъашхэзэ ышIынэу.

Уахътэ тешIагъэу мафэ горэм лIыр ящагу къызыдэхьажьым, такъыркIае хъугъэ хьэр къыпэгъочъыгъ. ЛIыр ащ дэджэгоу щытызэ шъузыр унэм къикIыгъ. Хъурэр зелъэгъум, ишъхьэгъусэ къегыигъ.

— Тэ къыттебгъэпытыхьагъ, ау о удэджэгу. Сенэгуе хьаулыеу сэгъашхэкIэ. Мыр хьэ хъатэ хъущтэпын фае. ЫкIэ егъэсысы нахь, хьакъун унашъуи иIэп.

— Зэ, шъуз, зыгъэбыяу, хьакъущтмэ игъо ифэнба, ащи уахътэ ищыкIагъ. Ори укъызысэщэм тхьэркъо Iасэм уфэдагъ, гущыIэ закъуи къыспэпIожьыщтыгъэп.Джы, о дыдыгущ, Алахьым къырыуемыгъэгъажь, хьэм нахь Iаеу укъысэхьакъужьы.

Бысымгуащэм зэ ыжэ къызэтырихи шъхьаем, ишъхьэ­гъусэ къыриIуагъэм бзако ышIыгъ.

Нысэмрэ гуащэмрэ тIэкIу зэIупхъуагъэх. Нысэр къызэрэпэгущыIэжьыгъэр шъхьэкIошхо щыхъоу гуащэр елбэтэу яунэкъощхэм адэжь кIуагъэ. Нысэри гусэ­гъаеу щагум къыдэнагъ. Ыгоу плъыгъэр зэригъэIэсэн за­къоу къыугупшысыгъэр, гуащэм егуаоу ыIуи, ащ иплащ ыщыхьанышъ, кIашъом дидзыеныр ары.

ТIэкIу ыгу зэIэсэжьым, ышIагъэр зэрэмытэрэз дэдэр къыгурыIожьи, упчIэжьэгъу ышIынэу гъунэгъу шъузым дэжь кIуагъэ.

Хъугъэр гъунэгъум къызыфеIуатэм, шъузыр шъуз Iушти, къыриIуагъ нахьыжъмэ тIэкIу афэбгъэгъун, щэIагъэ къызхэбгъэфэн зэрэфаер. ЫшIагъэр зэрэмытэрэзыр зэхыригъэшIыкIыгъ.

— Джы пшIэщтыр, — ыIуагъ гъунэгъум — укIожьынышъ, плащыр кIашъом къепхьыхыжьынышъ, зыдэщылъыгъэм бгъэтIылъыжьыщт. Гуащэм зыфэмыгъэгус, мыгущыIи фэмышI. Зи мыхъугъахэ фэдэу уиIофмэ ауж ихьажь.

Нысэр гъэсэпытхыдэм едэIуи, елбэтэу къэкIожьи, плащыр кIашъом къытырихыжьи, зыдэщылъыгъэм ыгъэтIылъыжьыгъ. Ежьыри иIофмэ ауж ихьажьыгъ.

ТIэкIу тешIагъэу гуащэри нэгушIо хьазырэу къыдэфэрэзэжьыгъ, зи мыхъугъахэ фэдэу нысэу Iоф зышIэрэм риIуагъ: «Икъунба, нынэ, непэ пшIагъэр, зыгъэпсэфыба, Iофэу щыIэр зэкIэ зашIэу пшIэн плъэкIыщтэп».

Нысэм гуащэм ыгу къызэрэфэгъурэр игуапэу, ышIагъэмкIи зиумысыжьэу, гъунэгъу шъуз Iушым зэредэIугъэм кIэгушIужьэу иIофмэ апидзэжьыгъ.