Адыгеир апэрипшIым ащыщ
Урысые къэбарлъыгъэIэс агентствэу «РИА Новости» зыфиIорэм шъолъырхэм яавтомобиль гъогухэм язытет джырэблагъэ зызэрегъапшэм, Адыгеир апэрипшIым ащыщ хъугъэ.
Апэрэ чIыпIэр Москва ыубытыгъ. Ащ игъогухэм япроцент 97,6-р шапхъэхэм адештэ. Ащ ыуж къекIых Ханты-Мансийскэ автоном шъолъырыр, Краснодар краир, Челябинскэ хэкур, Ингушетиер.
Адыгеим я 7-рэ чIыпIэр ыубытыгъ. ЗэрагъэунэфыгъэмкIэ, республикэм игъогоу шъолъыр ыкIи чIыпIэ мэхьанэ зиIэхэм япроцент 76,2-р шапхъэхэм адештэ. Архангельскэ хэкур зэкIэмэ ауж ит.
Агентствэм къызэритыгъэмкIэ, ащ гъогу дэгъоу иIэр процент 13 ныIэп зэрэхъурэр.
Урысыер зэрэщытэу пштэмэ, шъолъыр ыкIи чIыпIэ мэхьанэ зиIэ автомобиль гъогухэм япроцент 52,6-р шапхъэхэм адештэ.