Адыгэ къэралыгъо университетым ихьисап лабораторие чат-бот ытIупщыгъ, ащ ишIуагъэкIэ хьисап IофшIэн кIэкIхэр угукIэ къэпшIынхэ плъэкIыщтых.

Хьисапыр зикIасэхэм джы кнопкэ теIукIэгъу заулэкIэ хэушъхьафыкIыгъэ приложением яшIэныгъэхэр щауплъэ­кIунхэ алъэкIыщт. «Хьисапым иупчIэхэр» зыфиIорэ чат-ботым ишIуагъэр режимэу 24/7-м тетэу ахэр бгъэцэкIэнхэ зэрэплъэкIыщтыр ары, ежь IофшIэнхэр угукIэ къэпшIынхэ плъэкIынэу гъэпсыгъэх. Транспортым уисми, чэзыу горэм ухэт­ми е озэщыми къэпшIышъунхэу ахэр щытых.

АКъУ-м хьисапымкIэ егъэджэн технологиеу щыIэхэм я Лабораторие иIофы­шIэхэр ары проектыр зэхэзгъэуцуагъэ­хэр. Чат-ботыр хьисапымкIэ кIэлэеджа­кIохэм яолимпиаднэ онлайн-курсхэм ахэхьэ. А зэкIэри Адыгэ къэралыгъо университетым истратегическэ проектэу «Хьисапыр: нэмыкI еплъыкI» зыфиIорэм иIахь, ар университетым ипрограммэу «Приоритет 2030» зыфиIорэм щыщ.

Шъугу къэдгъэкIыжьын, АКъУ-м ипроект ишIуагъэкIэ УрысыемкIэ апэрэу хьисапым иегъэджэн технологиеу щыIэхэм я Лабораторие зэхащагъ. Ащ иIофышIэхэм сабыйхэм хьисапым ылъэ­ныкъокIэ сэнаущыгъэу ахэлъхэм хэхъо­ныгъэхэр ягъэшIыгъэнхэм пае ушэтынхэр рагъэкIокIых, олимпиаднэ хьисапымкIэ рагъэджэрэ кIэлэеджакIохэмрэ гъэсэныгъэ тедзэ ягъэгъотыгъэным ипрограммэ хэлэжьэрэ кIэлэегъаджэ­хэмрэ афэгъэхьыгъэ гъэсэныгъэ модульхэр зэхагъэуцох. Лабораторием шIэныгъэхэр щызэрахьылIэх, ащ иIофы­шIэхэм сэнаущыгъэ зыхэлъ сабыйхэмрэ ныбжьыкIэхэмрэ къыхэгъэщыгъэнхэм шъолъыр системэр халъхьэ.

«ЛабораториякIэр зыфэгъэзэгъэ лъэ­ныкъо шъхьаIэхэр: хьисапым хэхъоныгъэ егъэшIыгъэныр, сэнаущыгъэ зыхэлъ ныбжьыкIэмэ афэгъэхьыгъэ гъэсэныгъэ программэхэр зэхэгъэуцогъэнхэр ыкIи хьисап шIэныгъэмкIэ ушэтынхэр регъэ­кIокIыгъэнхэр. ХьисапымкIэ кIэлэеджа­кIохэм я Дунэе олимпиадэ хэлэжьэрэ Урысые командэм итренер шъхьаIэу Кирилл Суховыр ыкIи хьисапымкIэ урысые кIэлэегъэджэ пэрытхэр ары Iофтхьабзэм ипащэхэр», — къыIотагъ АКъУ-м иректорэу Мамый Даутэ.

Чат-ботэу «Хьисапым иупчIэхэр» зыфиIорэм джырэкIэ тестовэ шIыкIэм тетэу Iоф ешIэ. Хьисап IофшIэн кIэкIи 100 фэдиз непэрэ мафэм къэпшIын плъэкIынэу ар гъэпсыгъэ, ахэр куп-купэу зэтеуты­гъэх: «Натуральнэ сатыр», «Хьисап къэшIын зэфэшъхьафхэр». ТапэкIэ темэхэри, хьисапэу къашIыщтхэри нахьыбэ хъущтых.

«ЗэкIэхэми хьисапыр агъэфедэшъоу, цIыфхэмкIэ нахь Iэрыфэгъоу тшIыныр ары тэ тызпылъыр, джащ пае цифрэ сервисхэм хэхъоныгъэ ятэгъэшIы. Чат- ботыр зыгъэфедэрэмэ япчъагъэ хэпшIыкIэу хэхъо ыкIи хьисапыр зэщыгъоу бэмэ къызэрашIошIырэм урегъэхъырэхъы­шэ. КIэлэцIыкIухэм курсыр афытегъэ­псыхьагъэу щытми, ащ нахьыжъыIохэри хэхьэх, хьисап IофшIэн кIэкIхэр къыщашIы. Чат-ботым мафэ къэс кIэ горэ хагъахъо, а Iофыгъом шъори шъухэлэжьэн шъулъэкIыщт, ищыкIагъэу шъу­лъытэрэмэ анаIэ зэхэгъэуцуакIомэ атырадзэщт, онлайн шIыкIэм тетэу лъып­лъэщтых ыкIи программэр агъэ­кIэжьыщт», — къыIотагъ проектым ипащэу Кирилл Суховым.

Адыгэ къэралыгъо университетым ипресс-къулыкъу